U Montri wa pait ya ka chnat Community & Rural Development, u Hamletson Dohling ha ka dorbar mang tangka Meghalaya Assembly ynne ka sngi da pyntip u wa da em kamwa 4493 ngut kiwa da lai Pension ki wym em yoh ya ka bai baam tymmen hapoh ka National Old Age Pension Scheme (NOAPS).
Hawa e yei jubab hapoh ka yung dorbar, u Dohling da ing wa i wym yoh ya ka bai baam tymmen la ar snem toh neidaw wym em thap pyrtuid ki ya idæ hapoh ka Public Financial Management System (PFMS).
“Em kiwa e da ka Account Number wa bakla katwa kiwi da e ki da ka IFSC Code wa bakla,” da pyntip u Montri.
U Hamlet Dohling da pyntip u wa hapoh chi bnai waroh kitu ki wym em yoh Pension daw yoh ki mar ya thap pyrtuid ki hapoh ka PFMS.
U Montri da pyntip u leh wa kiwa dooh Pension daw yoh ki leh ya waroh ar snem wa dooh ki.
Da ong u leh wa ym toh wa mylliñ ya ini tangwa da leh ya waroh iwa emkaam yow pynbait smat ya ini i kaam yow yoh kiwa da chong ngiah yei hok yong ki.
U Montri da pyntip u wa ka bhah wa khaddooh da phah cha East Garo Hills, East Jaiñtia Hills, East Khasi Hills, Ri-Bhoi, South Garo Hills, South West Garo Hills, South West Khasi Hills, West Garo Hills wa ha West Jaintia Hills District ha u Thohlakhmi (Feb) 2022.
Katwa ha ka North Garo Hills wa West Khasi Hills District da pynlait ha u Duyatra (Jan) 2022.
Ki wym yoh bai baam tymmen ha ki District ka jylla man ki kamni ha wah:
East Garo Hills- 17
East Jaiñtia Hills- 8
East Khasi Hills-137
North Garo Hills- 28
Ri-Bhoi- 654
South Garo Hills- 1177
South West Garo Hills- 312
South West Khasi Hills- 200
West Garo Hills- 876
West Jaiñtia Hills- 965
West Khasi Hills- 199
