Em boon tylli ki skur SSA ha ka jylla kiwa em du 2-3 ngut ki khynnah

Shillong: U montri ka chnat puræ puthi ka jylla, u Lahkmen Rymbui da pyntip u wa em boon tylli ki skur SSA ha ka jylla kiwa em du 2 lane 3 ngut ki khynnah skur, katwa katkam ka kyndon toh u em uwi uwa sikai neibynta ki 30 ngut ki khynnah.

U Lahkmen da jubab ya ini hajrong wa kylli da ka MLA ka Mahendraganj ka Dikkanchi D Shira, kawa kwah u tip lada em ki skur SSA kiwa duna ya ka 20 ngut ki khynnah.

Katkam wa ong u montri, em 903 tylli ki skur wa duna ya ka 20 ngut ki khynnah wa kynthup 395 ki Primary wa 508 ki Upper Primary. Kiwa sikai ha ki Primary waroh ka jylla em ki 808 ngut katwa ha ka Upper Primary ki em ki 874 ngut wei waroh em ki 2682 ngut.

Hawa jubab chooh chooh ya i kylli pynrap, u montri da ong u wa katkam ka kyndon wa da booh kawi ka skur SSA toh u jngai ko kamwa 3 Km na kawi won, tangwa neiliang ka MLA ka Congress ka da pynsñiaw ko yei sñiawphylla wa ha ki thaw nongkyndong em ki hadooh 2 wa 3 tylli ki skur hapoh ka 1 Km.

Related posts

Hapoh dorbar ym lait ki tang u ang tangwa cha lait pynheh ki kam ki rem dorbar pynksan cha baar, ong u Titos ya ka EC ka VPP

June 26, 2025

Wanrah i ka mang tangka kawa boon dei yoh yei lut | Da pyndam leh ya ki Committee wa pynlut phut: VPP

June 24, 2025

U Lahkmen da ong u wa ka jylla Meghalaya man ko kawa boon tam ki skur wa wan chakhmat tam wot ha ka thaaiñ mihsngi ka India wei ini ye u man i daw wa duna ki khynnah ha ki skur SSA.

Ha iwi i liang u montri da ong u wa ka sorkar daw bichaar bniah ko wei ye leh wow pynyabi lang noh wa kiwi ki skur samen kiwa em 200-300 ngut ki khynnah skur wa puræ lada emkaam.