Shillong: I em ki chynrang wa da pyndep yei puræ Nursing dang duna bha ki ha ka jylla wei katkam ka yutip wa da yoh, da ong wa em du kamwa 30 ngut ki chynrang kiwa kreh Nurse ha waroh kawi ka jylla.
Ka president ka Trained Nurses Association of India (TNAI), Meghalaya Branch, ka I. Kharduit hawa yaklam ko wa kiwa thoh khubor, da pyntip ko i kaam nurse toh iwa wai ya ki chynrang wa ki kynthai tangwa ki chynrang dang duna bha kiwa wan cha khmat wow puræ Nursing ha ka jylla.
Chooh chooh da ong ko wa ha ka jylla Meghalaya em 3 tylli ki thaw puræ Nursing yong ka sorkar, neibynta ki 4 tylli ki rukom puræ Nursing kiwa kynthup ka Ganesh Das Hospital ha Lawmali, ka Shillong Civil Hospital wa kawi ha Rongkhon, Garo hills.
Kini ki thaw puræ ye ki u pdiang du 40 ngut chi snem kamtæ kitu ki wym yoh u puræ hapoh ka jylla da lai puræ ki cha baar jylla.
Ka Kharduit leh da ong ko wa booh ko ya ka kyrpaad cha ka sorkar jylla wow wai noh ya ka Nursing College hapoh ka jylla wow yarap ya ki khynroo khyllood kiwa kwah puræ Nursing wei kiwa kwah u puræ ya ki kyrdan wa heh ka Nursing.
Deiwa em kani ka Nursing ym haap de u mih cha baarjylla wei duna i lut i sep.
“Lada ym ye u wai ya ka Nursing College, ka sorkar toh u pynku kyrdan ko ya kiwa da em chwa ha kani ka jylla,” da ong ka Kharduit.
Kamwa man katni em kamwa 3,000 ngut ki Nurse hapoh ka jylla wei dang emkaam boon chooh chooh ki Nurse yow pynbiang yeiwa emkaam ha ki thaw sumaar wa boon.
Discussion about this post