Em hadooh ki Hotel sorkar kiwa pynbiang kynthai: Meena Kharkongor

Shillong: Ka Chairperson yong ka Meghalaya State Commission for Protection of Child Rights (MSCPCR), ka Meena Kharkongor da maham ko wow leh da iwa khor ya kitu kiwa emkti wow ieñ ya ki khynnah ha ki kaam khlem akor ki kaam pohjait wei ym map ya ki lada toh ki heh ki haiñ leh.

Ka Chairperson da ong ko ya ini hadien wa ki pulit ka West Jaiñtia Hills hadooh katni da yoh ki wow pyllait hadooh 24 ngut ki kynthai kiwa chah pynbor dai yei doh i pran ki wa kynthup ya ki 9 ngut kiwa dang hapoh 18 snem i rta, wei da kem leh ya 8 ngut ki bru kiwa da suba joor kiwa emkti wow phon ki hadooh wow poi ki cha kini ki jait kaam.

Ka Kharkongor da ong ko wa em ki Guest House wa ki Hotel kiwa emkti wow e thaw wow leh ya kini ki kaam sih wei da pynsñiaw ko yei khyrngiat wa em leh ki Hotel wa pynlai daka sorkar kiwa da pdiang wow wan leh ki bru ya kam kini ki jait kaam wei ka Commission daw leh ko deiwa eh ya kini leh.

“Em ki Hotel kiwa man leh yong ka sorkar kiwa e laad wow leh ya kam kini ki kaam sih, u chimkhia i wow yaklam wa ki bor wa ha khlieh yow leh ki da iwa khor,” da ong ko deiwa pynrap wa ka Commission daw yachem ko ha kini ki sngi ya u heh pulit (DGP) wow yaklam leh ya kani ka kaam khamtam wow pynman yaka khynra wa man i por ya ki Hotel wa Guest House. Wei wow booh noh da ka Special Task Force wow pait kyrpang ya ki kaam wa yathoh i chah thombor ki kynthai neibhah wa kamwa man katni duna ki bru wa pait ya kani ka kaam.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Katkam wa pyntip ka Chairperson, kini ki khynnah wa chah yah bakla ym toh neidaw wa man ki kiwa dooh wa duk toh neidaw wa dang man ki kiwa hok wa khooid wei ym tip ki da iwi tawon neidaw wa kiwa ha yung yong ki ym kitkhia wow pyrkhat lada wiar ki chi tayaw ar tayaw na yung leh.

“Ki bei ki pa toh u sikai toh u sneiñ ki yaki khon ym toh u ya beh ki du yaka poisa neidaw wa wanrah ko yei hiar dor hei manbru longbru,” da ong ko.

Ha iwi tawon i liang ka Chairperson da e khublei ko yaki pulit ka West Jaiñtia Hills wa ya u SP, u Lakador Syiem kiwa da kreh chitom wow pyllait ya ki khynnah wei wow kem ya kiwa emkti.

Ka khut ko leh ya ki dorbar chnong wa ki paidbah, ki seiñbhalang wei khamtam ki manbei manpa wow ya krehlang neibynta wow pyndooh jait ya kam kini ki kaam sih haka imlang sahlang.