Ki pulit ka Meghalaya da pyntikna ki wa em hi i pynlang paaid wei pynpsiah dkhot thymme da ki seiñ kieñ suloi hapoh ka jylla iwa da pynkhuslai yeiwa ye u sdang biang ki kaam yaleh hadien wa da boon snem wa da jai-jai i long i man.
Yeini da pyntikna da ka DGP, ka Idashisha Nongrang deiwa ong wa yoh khubor hi ki pulit yeiwa em i thmu wow pynpsiah dkhot thymme tangwa ym pu tip kayi ka seiñ næ ki bru wa leh yeini wei ki pulit dang paitbniah ki yeini.
Da ong ko leh wa uwa yahkhmat ka Liang Pyrchah, u Mukul Sangma da yaklam u chaphang ini ha ki yalang wa pynman da ka State Security Commission.
Da khana ko wa u Mukul tip u chaphang kiwa boon ki jiat wei ki pulit leh da booddien ki yeini. Deiwa pynrap wa u Mukul da khuslai u khamtam ya kitu ki khynroo ki wym biang ka puræ puthi kiwa ye wow lai psiah cha ki seiñ kieñ suloi yow pynim biang yeini i kaam hapoh ka jylla.
U Mukul heipor yong oo da ye u wow pyndem ya kiwa boon ki seiñ kieñ suloi, wei ha kani ka tayaaw da pynsñiaw u yei sñiawkhia wa wot ki khynroo wa da biang ka puræ puthi dadep ki wow psiah man dkhot wei da pyndep ki leh ya ka chah sikai ha kini ki kaam yaleh.
Da ong u leh wa lada ki pulit ong ki wym tip ki yeini pynyoo wym bna ki neibhah i yong sakhiat toh iwa yoomaa bha wa ki khynroo kiwa da biang i stat i tip dang psiah ki chapoh kam kini ki seiñ du neidaw wa chrai ki.
Discussion about this post