U DC ka West Jaiñtia Hills, u Garod LSN Dykes, da phah u ya ki kyntien e mynsien cha ka seiñ Khooid Ya Ka Wah Myntdu deiwa ong wa em i kyrmen ya ka mynried hawa kiwa chong chnong chim ki yei kitkhlieh pyn da ki ya ki hi yow pynneh pynsah yei soodong sookun.
Da e khublei u leh ya ki waheh chnong waroh yong ka sor Jowai wa kiwa yahkhmat niam waphær waphær kiwa da chimbynta ha ka ‘ Peaceful March-cum Awareness Rally’ wa da pynman ha ka 11 tarik kam chibynta yow pynsñiawthooh ya kiwa chong chnong yei emkaam u burom u sumaar ya ka wah Myntdu kam kawi na iwa e kordor yong u Blai ya ka jaitbru ha ka District yong i.
Da kyrmen u wa lyngba kani ka Awareness Rally u e mynsien ko ya kiwi tawan ki chnong wa em hapoh ka District yow chim ki yei kitkhlieh yow ri yow sumaar yei soodong sookun, ki mrad, ki sim, ki doh, ki doh-um wa kiwi kiwi wa da e u Blai ha i.
“Emkaam wow pynpsiah hei pyrkhat pyrdaiñ yow sñiawthooh wa u Blai chna u ya ki bru yow man donhi ki kam kiwa pait wa sumaar lane kam ki sordar ym toh won wow lehbeiñ lehtaroi ki hajrong iwa da chna pynman ki yong oo,” da ong u DC.
Heiyatoh wa i thmu ka seiñ wa ong ‘Save Myntdu River, Save Humanity”, da pynkynmoo ya oo i kyntien wa da ong da uwa thoh kot ha ka spah snem wa arphaw, u G.K. Gesterton heiwa ka Times Magazine da khut ko ya ki bru stat, bru proh jabieñ wow e ymut wow thoh hajrong ka phang “What’s wrong with the world?” namo iyi wa sih ha ka pyrthai heiwa u G.K. Gesterton da thoh donhi u “I Am” iwa mut wa nga samen wa waroh kiwi toh kiwa embynta lang hei sih ka pyrthai katni.
Kamtæ u DC da kyntu u wow yatylli, deiwa kylli kiyi wa pynsih dur ya ka wah Myntdu? Deiwa pynrap wa ye hi i u pynmiat pynbha biang sa chisien ya ka wah Myntdu lada waroh i sñiawthooh i wa toh nga, wa toh i kiwa pynsih dur ya ka wah Myntdu. “To u sdang chwa i na i da i hi samen samen yow man ka nongmuna ya kiwi tawan u bood ki.
Puræ leh: Pynyoo ki paidbah yei kyrchaan wow yakhih yada ya ka wah Myntdu
