U Montri ka chnat ki kaam pohyung ka jylla, u Lahkmen Rymbui da ong u ynne ka sngi wa i lai kynreh ya i yung u heh warim ka HNLC, u Cherish Starfield Thangkhiew toh wow yada na iwon iwon i jia khamtam hadien wa ki pulit da yoh yutip ki wa em ki bru wa thmu wow tympdung bomb ha Shillong ha ka 12 wa 15 tarik u Naisaphra.
Ya ini u Lahkmen da ong u ha yung dorbar hawa jubab yeiwa kylli u MLA ka Shillong West, u Mohendro Rapsang hajrong i pdung bomb iwa da jia ha ka 10 tarik u Naisaphra ha Laitumkhrah.
U Rymbui da ong u wa ki pulit da yoh yutip ki wa da em wa thmu wow tympdung bomb ha, wei neiliang yong ki da phah syndon ki ya ki Police Station wa ki Police Outpost wow paitsiar leh ya kiwa boon ki thaw, tangwa ha ka 10 tarik da jia noh i pdung bomb ha Laitumkhrah, iwa khlem poi pyrkhat.
Da ong u wa hadien ini ki pulit da kem ki ya ki 3 ngut ki bru kiwa suba wa emkti ha ini i kaam wei nei takit da chem wa u Thangkhiew da emkti u ha ini i kaam wei da em leh i thmu wow tympdung bomb ha ka 12 wa 15 tarik wei hadien wa yoh ya ki yutip ki pulit da lai kynreh ki ya i yung u Thangkhiew ha ka 13 tarik.
Chooh chooh hawa jubab yeiwa da kylli, u Lahkmen da ong u wa ki pulit ym em hok ki wow tynyap tangwa wow yada wei wow kem u takit wei wow leh katkam ki kyndon ka aiñ wei iwa jia ha ka 13 tarik ka sorkar da thung ko da ka Judicial Inquiry wow tip yeiwa sakhiat.
Hajrong i lai kynreh ya i yung u Thangkhiew hei step synyaw, u Lahkmen da ong u wa ki pulit em ki ya i bor wow leh yeiwa emkaam neibynta wow yada ya ki paidbah. Da pynrap u leh deiwa ong wa ki pulit dang takit ki yeiwa jia ha Laitumkhrah wow chem ya kiwa emkti wei wow takit ya i kam ka HNLC hajrong ini i jia hadooh katwon toh iwa sakhiat.
Kam wow pynkynmoo heini ka Meghalaya khamtam ha nongbah Shillong, ha u bnai wa dadep da sakhi ko yei chah ktah i chongsuk ha ka jylla waroh kawi, nadooh ka 10 tarik u Naisaphra hadien wa pdung u bomb IED ha Iew Shyllong, Laitumkhrah wei hadien ini da bood leh yei lai kynreh ya i yung u Cherish Starfield Thangkhiew ha i step ka 13tarik iwa da wanrah yei khlaad noh u Thangkhiew.
