Ynne ka sngi ka chnat PHE, Electrical Division da pynman ko ya i pynsñiawthooh katkam ka Meghalaya Vision Document 2032 hajrong ka phang “Sustained Piped Water To All” ha Yungwalieh ka Loomkyrwiang, Jowai heiwa ka B. Blah, Additional Deputy Commissioner, da man ko kam ka kongsan.
Ha kani ka yalang da yoh yei klam na u P. Synnah, EE ka PHE Electrical Sub-Division uwa da batai heiyatoh wa ka Mission Vision namo yi mut kani ka thong krehkaam ka sorkar jylla heiwa da khana u wa emkaam u em ka thong kamwa da yooluti u Chief Minister ka jylla, u Conrad Sangma wow pynman ya ka Meghalaya kam ka 1 Billion Dollar Economy wei wow man ko kawi na ki 10 tylli ki jylla wa ha khlieh tam ka ri namo ka Top Ten State.
Da khana u leh wa ka sorkar kwah ko wow e umkor ya waroh ki manyung hapoh ka jylla heiwa emkaam wow krehlang wa ka sorkar ym du hei e umkor tangwa ha kiwi tawon ki kaam pynroi leh kamjooh.
Da ong u leh wa ka sorkar pyrdi da ong ko wa khnang wow yoh ya u sarok emkaam ya ki bru u e thaw ki kamtæ kam kini kiyi kiyi waroh man kiwa emkaam bha.
U R. Nongtdu, kam u bru chemphang da batai u hajrong ka phang, “Preserve water reservoirs and enhance infrastructure for supply and distribution” heiwa da batai u kammon wow yada wei wow pynneh ya ki tyllong um khnang wow ye u saam umkor katkam wa yah ka juk wa katni wei yeitæ da ong u wa ye u leh toh deiwa thung dieñ kamwa 20 metre ha tymbud ki wah.
Da kyntu u leh wa iwon iwon i jakhlia wa mih na ki yung ki sem lada ye ymtoh u pynlai ya ki cha ki wah.
Heijooh i por da ong u wa hapoh ka Scheme JJM, ki chnong toh u su ki 5% na i lut ha kawi ka kreh wei yeini da leh khnang wow em i sñiawtre ka chnong ya ka Scheme.
Heijooh i por da e nongmuna leh ya ka chnong Mulum (hapoh Laskein Block) kawa chim poisa na waroh ki manyung Rs. 50 chi bnai wow su tulop cha kiwa kreh wa da thung ka chnong wow wai um kamjooh wow chna (Repair) ya ki Pipe hapoh ka Scheme JJM.
Neiliang u T. War, Divisional Soil & Water Conservation Officer da batai u hajrong ka phang “Enhancing urban and rural water supply infrastructure” namo wow pynjanai yei rukom saam um ha sor wa palatsor.
Ka B. Blah, kam ka kongsan hawa e i klam da kyntu ko ya waroh wow yakrehlang wa ka sorkar khnang wow ye u yoh ya ka thong kawa ong Meghalaya Vision 2032 deiwa kyntu leh ya ki chnat sorkar wow yakrehlang ki para ki deiwa e buit katkam wa tip ki.
Da ong ko wa ka Meghalaya da tip kam ka thaw chong ki la’oh wei kini ki la’oh man kiwa e ya ka um ha ka jylla tangwa lada ymye u pynemkaam wei wow syndong ya ka um, kini waroh man kiwa sepai.
Kiwi kiwa da klam kynthup ki ya ka Eladaka Biam, Deputy Manager Basin Development Unit kawa da batai hajrong ka “Improving the water availability across the state”, u R. Challam, Sub-Divisional Officer (PHE), Electrical Sub-Division uwa da e u ya ki kyntien khublei.
Ha kani ka yalang da wan chimbynta da ki dkhot ki Village Water and Sanitation Committee (VWSC), ki Waheh Chnong wa kiwi kiwi.
Yei klam pdiang burom na ka R. Kynjin, Executive Engineer (PHE), RWS, Jowai Division.
Discussion about this post