I thooh bniah da ka Single Member Committee wa khlieh da u Judge (Rtd) BP Katakey kawa man kam chibynta ka mukotduma wa da yaleh da ka High Court ka Meghalaya hi heiyatoh wa u mooyong wa tih pyrchah aiñ wa pynemkaam da ki Coke Plant wa ki Ferro Alloy Pant kawa da yoh katkam ka 20th Interim Report wa da e cha ka yung bichaar da chem wa da em kiwa pynemkaam da u mooyong wa tih pyrchah yaka aiñ.
Yeini da chem deiwa leh Audit yow chem neiwon wan uni u mooyong wa da pynemkaam ha kini ki karkhana heiwa da chem wa da em 8 tylli ki Coke Plant kiwa da pynemkaam da u mooyong wa da tih pyrchah yaka aiñ wei khlem da su yaka Royalty waka Cess.
Da phah leh ya ki Demand Notice cha kini ki Coke Plant heiwa 5 tylli da su ki ya ki Royalty waka Cess katkam wa da phah, kawi won da ong ko wa daw su katwa ar tylli won ym pu em e jubab ki.
Na kini kiwa da su da em ki 4 tylli ha East Jaiñtia Hills wa kawi ha West Khasi Hills.
Katkam wa pyntip won u Member Secretary ka MSPCB, na ki 19 tylli ki Coke Oven Plant wa em ha East Jaiñtia Hills kiwa da yoh yaka Consent To Operate (CTO) iwa mut yow krehkaam toh 9 tylli katwa kiwi ki 10 tylli toh ki wym em yoh yaka CTO.
Ha West Khasi Hills na ki 4 tylli ki Coke Oven Plant, da em du kawi kawa em CTO neitæ ha South West Khasi Hills District na waroh 6 tylli ki Coke Oven Plant ym em kawi leh kawa em CTO.
Ini mut i wa na ki 31 tylli ki Coke Oven Plant wa em hapoh ka jylla, kiwa da e bor wow chna namo ka Consent To Establish (CTE) da ka MSPCB, da em ki 12 tylli katwa kiwa da yoh CTO yow krehkaam katwa kiwa sah won kiwa em 19 tylli ym em yoh bor ki wow krehkaam.
Heiyatoh won wa ki 7 tylli ki Ferro Alloy Plant kiwa em 6 tylli ha Ri-Bhoi wa kawi ha West Khasi Hills District toh kiwa da em CTO katkam wa da pyntip da u Member Secretary ka MSPCB.
Kamtæ da phah ya ki DC kini ki District wa kini ki 19 tylli ki Coke Oven Plant ymtoh wow krehkaam ki.
Discussion about this post