U Montri ka chnat Pynroi Sor ka jylla u Sniawbhalang Dhar da pynsñiaw u wa ka sorkar ym ye ko wow noh hi-eh cheini cheitai ya ki bru kiwa chong wa sah ha Them Metor, tangwa wow thooh ki laad ki luti wa waroh u ya kmenlang neibhah wa waroh toh kiwa chong chnong ka jylla.
Hadien wa ka High Level Committee da dep ko wow ekti ya ka bui (Report) hajrong ka Them Metor cha u Montri Rangbah, neiliang ka sorkar da chimkti noh ki ya ka thaw ha Them Metor, ya kawa da pynkit ha ka chnat Pynroi Sor (Urban Affairs) wow pynkhooid wei wow kyrriah noh ya ki bru kiwa sah ha katai ka thaw.
Hawa yaklam wa u Sniawbhalang da ong u wa kamwa man katni ka chnat ym pu em ko ya ka Report wa pura katwon tylli ki manyung kiwa da chah kyrriah, tangwa da pyntip u wa da em won ki kattu katni ki manyung kiwa toh ki wakreh ha ki chnat waphær waphær ka sorkar kiwa da dep wow kyrriah na katai ka thaw.
Da ong u wa neiliang yong ka sorkar ym em chong kli kti ko tangwa ki kaam dang lai ki chakhmat, wei ka sorkar daw leh ko ya iyi wa toh u leh wei ym mut leh wa du wa em i pyrchah ka sorkar suki hi-eh ko, deiwa pdiang leh wa ka sorkar hap ko wow pait wei ap ya ki bynta kiwa emkaam, kamtæ hap wow lai da ka luti kawa toh.
Da ong u wa katni i kaam da lai chakhmat wei neipor cheipor neiliang yong u Symbood Montri Rangbah da dep u wow klam wei wow pynsñiaw ya iyi iyi waroh katni wa dang em hapoh ka luti wei wa i kaam leh dang lai chakhmat.
Da ong u wa ka sorkar daw leh ko ya iwa bha ha i rukom wa toh neibhah wym ye wow noh neibhah ki toh kiwa chong chnong yong ka jylla, wei hap wow paitbha wa waroh u ya kmenlang wei ini toh i kaamram yong ka sorkar.
