U Chief Executive Member (CEM) ka Khasi Hills Autonomous District Council, u Titosstarwell Chyne da ong u wa ye wow em i duna heini heitai heiyatoh wa i pynbiang ya ka yukheiñ ya i rukom pynlut ka KHADC, wei ya kiwa duna ka Council da man ko kawa smat wow pynbait.
Kam wow kdaw heini ha ki kajiak sngi wa dadep u Comptroller and Auditor General of India da thoh u cha u Lat ka jylla, u Satya Pal Malik wow tuklar u hajrong i wymye wow pynbiang ki District Council ya ki yukheiñ, heiwa u Lat da yaklam u leh wa ka sorkar jylla wa emkaam wow phah ya ki ADC wow pynbiang ya waroh ki yukheiñ heiyatoh wa i rukom pynlut poisa.
Hajrong ini, neiliang u CEM da ong u wa ka bui na ka CAG jooh wan ko manda kut snem ka mang tangka (Financial Year) wei kawa khaddooh wa ka KHADC da yoh ko ya ka toh ha ka 11 Naichiphaw u 2021, kawa kut du hadooh 31 Wisu 2013, iwa mut wa hadooh ka 31 tarik u AG dadep pait u ya ka yukheiñ (Audit) i pynlut ka KHADC.
Da ong u wa neiliang ka KHADC da yaleh ko wow pynbiang ya waroh ki yukheiñ, hadien wa da yoh ki ya ka bui. Heijooh i por da ong u wa iwi wa u CAG da chem u toh wa i wym biang i rukom pynbiang ya ki Utilisation Certificates (UC) da ki MDC, neibhah ki yarap wa ki MDC yoh ki kam ka Discretionary Grant, næ i yoh na ki chnat sorkar barabor da e bait ha ki MDC, wei hap yang ki ya ki UC wow pynyoo heiwon da pynemkaam ya ka poisa, wei heini ka KHADC da chem chitom ko neibhah wa ya ka Discretionary Grant toh kawa da e cha ki paidbah wa chem jynjar, wei eh wow pynbiang ya ki UC, wei em leh ki khep wa ki MDC kheiñ stiñ ki wow pynbiang ya ki UC.
Heiyatoh wa i pynkrehkaam ya ki Scheme pynroi, da ong u wa ini ym thut i neibhah ya ka UC hap bait wow e, wei ymtoh iwa eh neibhah wa ki Contractor hap kreh ki ya ki kaam wei ya ka poisa won da pynlait won hadien.
U CEM da ong u leh wa kiwi won kiwa hap wow bichaar bniah toh wa em ki Scheme kiwa da e wow pynkreh lyngba ki Dorbar Chnong, ki seiñ wa ki bor pynlai skur, neibhah ya kini ki kreh ym jooh khate ya ka VAT, wei iwa ka CAG chem ko toh wa khlem khate ya ka VAT na ki kreh wa da e cha ki Dorbar Chnong wa ki seiñ.
Chooh chooh da ong u wa daw thooh laad u wa hadooh katwon snem wa da e yukheiñ ka Council, neibhah kamwa mih hadooh ka 1 Naitung (Apr) 2013 hadooh katni ympu dep pynbiang ya ki yukheiñ, namo boi em ki snem wa dadep u AG ympu ye u wow leh. Heijoh i por u CEM da ong u leh wa lada em iwon iwon i artatien da man u uwa pdiang wow em da ka takit wow chem yeiwa duna waroh.
