Hadien chitayaw tam wa da lai bait i e dawai yada COVID-19 ya iwa da sdang chwa na ki wakreh ha i chait i khiah, hadooh ynne ka sngi da em 1116 ngut kiwa da yoh ya ini i dawai hapoh ka jylla wei na kini du 10 ngut donhi kiwa da ood wa sñiawphær ki ya i doh i pran yong ki hadien wa yoh ki ya ini i dawai.
Hawa yaklam wa u Joint Director ka Directorate of Health Services (DHS), u Dr. SS Nongbri da ong u wa kamwa man katni, ki paidbah wot ki wakreh ha i chait i khiah dang artatien ki wow wan chakhmat neibynta wow e dawai neibhah wa dang tieñ ki wei khamtam hawa yoo ya ki khubor na baar jylla wa ong wa em ki bru kiwa ym sñiaw yatoh i doh i pran ki wa ini i dawai wei kamtæ ter ter.
Heijooh i por u Dr. Nongbri uwa toh u pait ya ini i e dawai ha kani ka jylla da pynsñiaw u wa hadooh ynne ka sngi ym em iwon iwon iwa phær ya kiwa da yoh ya i dawai lait na ki 10 ngut kiwa ood chitom tangwa kiwa ymtoh na ini i dawai yada COVID-19.
Da ong u wa ka chnat hadooh 1:00 waje ynne i sngi kiwa da yoh ya ini i dawai toh em ki 1116 ngut.
U Dr. Nongbri da ong u leh wa i e dawai ka chnat ya ki bru ym mut i du wa leh jhan tangwa kwah ki wow leh rap suki khnang wow ye u booddien yei man i long i doh i pran yong ki bru kiwa da yoh ya ini i dawai.
