U MLA ka UDP na Nongpoh, u Mayralborn Syiem ynne da wanrah u da ka Zero Hour Notice hapoh yung dorbar yow yaklam yei mih roi ki YouTuber kiwa da pynpoor ya ki khubor thok lyngba kiwa boon ki YouTube Channel kiwa da sdang da ki bru paidbah.
Yeini da klam u hadien wa ujor FIR ka Synjuk Rangbah Shnong Ri-Bhoi heiwa da kem leh ya ar ngut ki bru kiwa pynpoor yaka khubor thok pyrchah ya u Chairman kani ka synjuk uwa tip kam u BB Makdoh heiwa da pynemkaam leh yei dur u.
Ki bru wa sdang ya uni u YouTube Channel toh kiwa tip kam u Fernando Diengdoh uwa na chnong Kynshi wa u lok u, u Neverson Marbaniang.
Da ong u wa kam ini ymtoh u jia i heiwa da pynbood naam yei pyrtuid u bru wei da ong u leh wa ki YouTube Channel em ki ar jait heiwa kawi toh kiwa sdang da kiwa thoh khubor wa pura wei kiwi won toh kiwa da sdang yow chim kabu yeiwa jia du yow pynhun ya uyi ræ uyi næ kawon kawon ka seiñ wei da leh ki yeini khlem da booh pood tang wow em boon kiwa pait wei yow yoh boon ki Subscriber.
Da ong u leh wa kiwa thoh khubor wa pura toh kiwa kreh chitom yow e ka khubor wa biang tangwa kitu kiwi won ki YouTuber toh kiwa kreh ya uyi ræ uyi du wow pynbood naam ya kiwi wei ymtip mynstep mankawi daw jia i jooh ya ki MLA næ kiwon kiwon ki bru paidbah wei ka sorkar toh u chimkhia ko yeini i kaam.
Da e nongmuna u leh wa kitu kiwa im wa sah ki thaw wa palatsor ki pli ngait bait ki katwa yoo ki ha ki Mobile Phone ki khamtam ha YouTube khlem da tip iyi i thmu kini ki bru.
Da ong u wa ka sorkar toh u wanrah ko da ka Broadcasting Code of Ethics yow ye ko wow khanglaad ya kitu kiwa pynpoor ya ki khubor thok.
Discussion about this post