Ha ka 1st Regional Camp neibynta ka Khasi wa Jaiñtia Hills, da pynman ya ka da ka yung krehkkam u Deputy Commissioner ka West Jaiñtia Hills District chirup wa ka Meghalaya State Food Commission ha chnong Shangpung ha ka 15 tarik uni u bnai neibynta u pynche hajrong ka National Food Security Act 2023, heiwa neiliang u Comingone Ymbon, Montri ka chnat Food Civil Supplies and Consumer Affairs hawa e yei klam kam u kongsan da ong u wa i wanrah ya kani ka yalang toh neibynta u pynsñiawthooh paidbah yow tip ki yei hok yong ki.
Heiyatoh wa i rukom yoh khoo rachon, ong u wa sñiawsih boon kiwa rap dap rap biang leh yoh Card Rachon ki katwa kiwa duna i yoh i la won dooh ki yei hok.
Kamtæ kyntu u ya ki waheh chnong wow pait bniah ki ha jar jiar ki chnong ki thaw wa ya kitu kiwa krehkaam sorkar toh u pyndooh noh yei pyrtuid yong ki deiwa e noh cha kiwi wa toh hok u yoh bynta.
Da pyntip u leh wa yei thmu wow pdiang ya kiwa yaleh namo kiwa Apply thymme ya ki Card Rachon da hap pynslem neidaw wa wan ka khlam COVID-19, wei la kammon kammon ha u snem 2025 ka sorkar u leh noh hi ko.
Heiyatoh wa u Aadhaar ong u ka jylla Meghalaya toh kawa cha tre dooh hei pynpsiah pyrtuid hawa nujor wa kiwi ki jylla ka ri, kamtæ kyntu u ya ki paidbah wow yaleh Aadhaar khnang yow yoh ki laad yarap waphær waphær na ka sorkar, ya boi poi pathan i por wot yow khoo rachon leh ym e de lym em Aadhaar.
Heijooh i por kyntu u leh wow booh ujor smat smat lada yoh khoo duna næ chah pyndooh yei hok kamwa mang ka sorkar deiwa Phone ha u Toll Free No- 1967, WhatsApp-9402327737 wei deiwa lai ha ka Website www.megpgrams.gov.in.
Ha kani ka sngi da emlang leh u P.S. Thangkhiew, Chairman ka Meghalaya State Food Commission wa kiwa mihkhmat na ki District waphær wa kynthup ya ka East Jaiñtia, West Jaiñtia, Khasi Hills wa kiwi de.
U S.K. War na ka Food Civil Supplies and Consumers Affairs hawa klam da batai u ya ki kyndon waphær waphær i rukom saam khoo wei ong u leh wa ka Vigilance Committee wa da thung ha man ki chnong wei toh u paitsiar ko la poi khoo tikna hi mo man-u-bnai, wei la jia wym poi leh toh u ujor.
Chooh chooh ong u wa hawa ka sorkar phah ko wow leh iwon iwon ya ki bru, da em bait i myntoi neibynta yong ki leh. Itæ toh lada ki Wholesale wa lai chim khoo ki na FCI da su ya ki ka bai kit bai bah heidor Rs. 105 chi Quintal, ya kiwa saam khoo rachon won ka sorkar da su ko Rs. 180 chi Quintal. Tang wow ong won wa ya u khoo da saam mynkna hi-eh khlem yoh bai kari itæ toh iwa bakla, neibhah ka sorkar da pynbiang ko.
Discussion about this post