U heh ka Bharatiya Janata Party (BJP) uwa man leh u MLA ka South Shillong, u Sanbor Shullai da ong u wa i kaam rap ood i bar yei ktien wei ngait u yei kyntien wa ong “Kreh chiboon klam kajiak”.
Da ong u wa em kiwa mihkhmat kiwa klam lakam wow poi noh ki cha bneiñ katwa tang ha narok ka ksaw leh ym poi ki.
Ini i klam u Sanbor toh hajrong i pynbaad uwa yahkhmat ka Liang Pyrchah, u Ronnie V Lyngdoh wa u Sanbor ym jooh klam u iwon iwon hapoh Yung Dorbar.
Hawa klam ynne ka sngi, u Sanbor da ong u wa i pynbaad u Ronnie wa ym jooh klam u ha Assembly toh i wym sakhiat deiwa pynrap wa iwi i daw wa ym jooh klam u katni toh wa em u ha ka sorkar, tangwa da ong u wa poi bait u chapoh ka Yung Dorbar wot ha ka Dorbar Mang Tangka wa dang kut wot.
U Sanbor da ong u wa ha u snem 2020 wa joor ka khlam COVID-19 da klam u hapoh Assembly wei deiwa yaklam da ye u mynjur wow mang yarap na ka MLA Scheme Rs. 50 lak cha kawi kawi ka Constituency, wei da pynrap u wa kam kitæ ki mat wa emkaam bha wow yaklam hapoh Yung Dorbar.
Da ong chooh chooh u wa ya ki kaam yong ka Constituency ym emkaam wow klam ha Assembly neibhah man-ka-sngi da klam u ha ki sahep, wei yi u myntoi wow pynlut ya i por ka Yung Dorbar wow klam yeiwa emkaam ka Constituency.
Ha iwi i liang u Sanbor da pynkynmoo u wa jooh klam langær u ha dorbar hajrong kiwi ki mat kam ka CAA heiwa da phah dorkhat u cha ka Ministry of Home Affairs, wei da e kti u yaka dorkhat wa da dep thoh ha u President ka HYC heipor wa pynman yaka yalang paidbah ha Madan Student ha Jaiaw wa da emlang u HS Shylla.
Heiyatoh wa ka UCC ha itu i por, da ong u wa da klam u hadooh Delhi wei da yachem wa u Montri Rangbahdooh, u Narendra Modi wa ya u Amit Shah uwa man u Union Home Minister, wa kamjooh yaka ILP ym jooh mylliñ u wow klam.
Discussion about this post