Da: U Wandell Passah
Ka parom ka Block-I: Ha ka 26 tarik u Duyatra (Jan) 1950, u Dr. Ambedkar da chna u ya ka Constitution ka ri India kam ka ri wa da laitlooid. Ka Para X (Article 244) wa Para XII (Article 275) toh kiwa yada ya ki jaitbru ri-loom, ki Dalit, ki Adivasi na ki heh paaid wei da yada haroh ki ya ki thaw ki bhaw nei chah lehbeiñ, i kaam tih mookordor, i pam dieñ wa kiwi kiwi.
Tangwa ha ka 13 tarik u Naitung (Apr) 1951, 15 bnai duna hadien wa chna ya ka Constitution ,u Lat ka Assam da chna u ya ka United Mikir & North Cachar Hills District lyngba ka Notification. Uni u Lat da tyngkheiñ u ya ka Constitution deiwa wanrah u ya ki Mikir (ymtoh kitu na East Mikir Hills næ West Mikir Hills) tangwa na ka Kopili Jamuna Valley wa katni da khut ki Nowgong wa Sibsagar ym duna da ki 100 Km na i thaw ki Labang Nangphyllut. Kini ymem yatoh neiwon neiwon i liang la ha ka chim jait (ki Mikir na u pa, ki Pnar won na ka bei wa ki dustur rit leh pher bak-la-bak).
Uwi wa thoh kot, u Phillippe Ramirez u wa thoh ya ka kot People of Margins -Across Ethnic Boundaries wa da pynmih ha u 2014, da thoh u wa u Lat ka a Assam ym du wa wanrah u ya ki Mikir na jngai wow chong wa ki Pnar, tangwa da pynyachrut u para jaitbru ri-loom.
U Larsing Khyriem, u MLA wa nyngkong dooh ka Jaiñtia ha ri India wa laitlooid da e u ka Note of Dissent (mut wa pyrchah) ha ka 31-10-1950 hei por man Assembly. U Chief Minister, u Bishnu Ram Medhi leh e u ka Note of Dissent heijooh i por hapoh Assembly. U Larsing Khyriem da batai u nadong chadong wym em iyi iyi itæ i yatoh manbru.
I buit won ki Mikir wa heipor chna ki ka 6 Man Enquiry Committee thung haroh ki ya u Larsing dei thmu wow khroh ya oo. Tangwa oo won da yieñ bait u ha ka yurim ka yong oo. Kam kini ki MLA wym tieñ ya u Lat ym yoh de i katni, wei man ko iyi iyi wa sñiawsih ha kini ki juk wa katni.
Dei leh chitom ka United Khasi & Jaintia Hills Autonomous District Council, ki dkhot kam u MM Jahrin ARD Jowai wa u Albert Laloo, Senior Recorder, Jowai da kyrpaad ki ya ka sorkar Assam waw klam ko ya u CEM ka Mikir Hills District waw pynbait pood. Ka Assam kopsar e mon ko ya u CEM wym bien u chong lang wow pynbait. Wei da ong u wa hap pynbait chwa ya u pood ka Mikir Hills District.
Lai i por wei khaddooh won da yoh u phah biang namo Re-Transfer ya ki kattu katni ki chnong cha Jowal Sub-Division. Tangwa ym sñiawthooh sñiawthaw phi wa hap su pyndep i dan cha u Mikir ya kitu ki thaw wa da pynuiñ biang.
Heipor wa da chna ya ka United Mikir & North Cachar Hills, ar ngut ki khynroo, u Trod Sariang Thaiang wa u Pin Sariang Thaiang da pyrchah joor bha ki neibhah kammon u pdiang wa ka Labang Nangphyllut u haap ko ha kani ka United Mikir & North Cachar Hills wei da wan ki pulit Assam kiwa da rah ya ki cha Nowgong Jail wei da yap ki ha patok.
Em ka kot (Diary) wa thoh kamni deiwa pynkylla chei ktien Pnar “Dei mynsiem wa kmen hadooh kattæ kattæ, da e kti O kani ka kot, ka parom hiar pateiñ (History) ki bru ka Labang Nangphyllut wa Pangam Raliang.
Cha,
U Trod Thaiang Sariang, u Pin Thaiang Sariang kiwa da chah dat chah bom hadooh wa yap ha Nowgong Jail du neibhah wym bien ki u pdiang wa ka Labang Nongphyllut u haap ko hapoh Mikir Hills District.
Ya ka Labang Nangphyllut-Pangam Raliang da khloh dei bor na Jaiñtia Hills ha u 13-04-1951, wei wa kani toh ka lyngkhooh dap 50 snem yong kani ka yakut wa sñiawsih tam. Kani ka kot hei sakhiat toh i pynkymoo ya ki paaid yei yaam ki paaid lyngba ki 50 snem i man bro.
Te ki por da lai 70 snem. Embhah wa da yoh da u Markus M Thaiang na Dispur yaka kot wa thoh wa ya ka Assam Notification 13-05-1951 da Supersede (da pyndooh bor) da ka chithi No.RSR/296/51/130. Da thoh leh ha ka Assam Gazette sla 613 tarik 13 March 1957. Embhah bha wa heipor por yoh Hill State, da rah lut ki cha Dispur. Sñiawtoh u e khublei chihajar ngooh ya u M M Thaiang.
Kynmoo tympang kitu ki snem nadooh 1957 hadooh 2023. Chish ma dei tip wow yoh katai ka chithi te kitu ki chah lehbeiñ ki bru ka Labang Nangphyllut 66 snem te ym jia ki.
Iwa jia dang ini wa da chah phut ki jhoor ki jhep, i knieh ya ki ñiangkseh wa pynlang ki khynnah, i lehbeiñ ya ki kynthai khynnah, i khrong dan ter-ter ym jia i. Itu wa chah siat ha Mukroh wa da dooh 5 ngut ki mynsiem hadooh wa da wan u Montri Rangbah, u Conrad Sangma wow su T. 5 lak wei da pyndam leh ya ka Cherry Blossom Festival kawa chongdor T. 16 klur du neini wa jia ha Mukroh.
U muktiar yong ka Labang Nangphyllut da yoh u ya kani ka kot. Tæ ym em artatien wa ka Supreme Court wa emburom daw rai ko iyi wow pynsñiawbha wow pynim yei hok ki Labang Nangphyllut.
Ka Block-II leh da yoh ya ka parom pateiñ (History) wa ka Map kamwa da yoh ka Labang Nangphyllut. Ki Langsoh-Mynriang toh ki ki tre chnong hapoh Sirdarship Langsoh Mynriang. Ka wah Umsiang tooid ko na Dam cha Bhoi Lymbong wei ha 30 næ 40 Km, kini ki Nongtung ha ri Khasi da kaap ki ka ka Umiam wow chonglang wa ki Pnar ki Langsoh- Mynriang wa katkam ka National Draft Constitution of A Part of Assam, Namely THE KHASI AND JAINTIA HILLS by Rev.JJM Nichols Roy (Minister of Assam) kiwa boon bru (Population) toh 3,752. Tæ sñiawthooh che wa ki Nongtung da em ki chi troh donhi heitu i por.
Neitæ i daw wa i klam u P. Tynsong wow e ya ki Regional Committee ka Khasi Hills u yaklam ya Block-II ymtoh kawa chong nia. Ki Pnar toh u yoh ki i hok wow rai ya Block-II. U Pa’iem Khyrim tæ toh u Syiem ha Umjong jngai bha na Block-II.
Hei pynbait pood emkaam ka History, Political History, Geography Map (Topographical) deiwa lai sorjamin deiwa lai hiar dei kjat wei iwa khaddooh wa emkaam dooh toh i maya ya ki MLA ki yong i wow yieñ hei hok hanlada chah pynchoi, næ wot lada kini ki ar CM maya ki para ki hadooh kattæ kattæ.
‘Aa Woh Kiang Nangbah, Aa Sajar Nangli,
Ya i to yah da kawon ka luti wow pynem warom ya ka ri yong i.
Paralok waroh kynthai wa chynrang
Bood ya ka luti kawa toh ham ya sñiawphalang,
Ham ang phi yei spah ha wow dooh phi yei hok,
Ham ap i phon i pah kiwa chukor wa thok- (I rwai MDC 1957, Shangpung)
Discussion about this post