U Erwin K Syiem Sutnga uwa man uwa ya saaid aiñ da ong wow yada nei chim jait naphang yong ki bru ki wym toh ki khon Khasi lyngba ki Affidavit, emkaam wow pynkrehkaam tikna wei pura ya ka Khasi Hills Autonomous District Khasi Social Custom of Lineage Act, 1997.
Da ong u wa lada ye u kylla aiñ sa ka Clan Administration Bill, daw pynkhlan chooh chooh hawa yatoh wow kdoh u khoom yei chim jait khiar ki bru ki wym toh ki Khasi wa ha ka rukom synchaar pynlai ya ka kur ka jait ha waroh kawi ka Bri U Ynñiaw Trep.
Ka Synjuk yong ki Rangbah Kur ka Bri Hynniewtrep (KSRKBH) ha ka 24 tarik uni u bnai da lai yachem ki wa u Chief Executive Member ka KHADC, u Pynïaid Sing Syiem wow yatai hajrong i chah pynuiñ ka Clan Administration Bill wa da mynjur da ka KHADC.
Ha ini i yachem, neiliang ka synjuk da tyrwa yei pyrtuid u Erwin wa u RL Blah wow thung kam ki dkhot wa pura hapoh ka synjuk.
U Erwin da khana u wa ini i yachem da yaklam yei pynkylla jait yong ki wym toh Khasi lyngba ki Affidavit, wei na ka synjuk da kyntu ko leh ya u CEM wow tuklar smat ya ini i chim jait khiar deiwa pynemkaam pura ya ka Lineage Act, 1997. Da khana u wa neiliang u CEM leh da pynsñiaw u wa man iwa emkaam wow leh iyi iyi hajrong ini i chim kabu yong ki wym toh ki Khasi.
Discussion about this post