U Lahkmen Rymbui uwa man u Montri wa pait ya ka chnat Puræ Puthi ha ka jylla da ong wa ym pu yoh yukheiñ hadooh katwon em ki khynnah skur kiwa da pep noh ha ki ar snem neidaw i wan yong ka khlam, wei da pynsñiaw u yei sñiawkhia hajrong i em ki khynnah kiwa ieh noh chiteiñ por yei puræ puthi ha kini ki ar snem neidaw wa ktah ka khlam COVID-19.
Da ong u wa ka sorkar da bichaar bniah bha ko hajrong ini deiwa pynrap wa ki sikai ha ki kamra yung skur man ki kiwa emkaam bha neibhah wa yaphær ko chiboon na ki Online Class, deiwa ong leh wa ym ye wow kyntait wa i em i pep skur chiteiñ por ha kini ki ar snem wa da dep, wei da ong wa ka sorkar daw pyntikna ko wow leh iyi iyi wow yada nei pep skur chiteiñ por ki khynnah.
U Rymbui da ong u leh wa ka sorkar India ha ka mang tangka wa da wanrah hapoh ka Parliament da pynku ko ya ka mang tangka neibynta ka puræ puthi hawa nujor wa u snem wa da dep, da ong u wa ini pynyoo ko wa ka sorkar India ka sñiawthooh ko yei em i hiar ha ka puræ puthi wei wow kyntu biang yei emkaam i ya krehlang yong ki sorkar jylla deilang wa ka sorkar pyrdi.
