Emkaam hi ya ka luti rel khamtam ha Meghalaya kawa tang ya u brut lamieñ leh hap wanrah na baar: Mayralborn Syiem

U MLA ka Nongpoh, u Mayralborn Syiem da ong u wa lada wan ka rel kit mar cha ka jylla daw yarap ko ya ki paidbah wow yoh ya ki mar wa duna dor neibhah daw pynstiñ yei kit i bah ym kamwa man katni deiwa hap wow kit da ki kari.

Hawa yaklam wa kiwa thoh khubor, u Mayralborn da ong u hanla ym ye wow pyndooh yei eh 100% tangwa daw yarap chiboon ya ki paidbah neibhah wa ka jylla Meghalaya da chaniah ko waroh na kiwi ki jylla wow wan wot ya u brut kyrchut lamieñ.

“Ha jylla yong i, nadooh u khoo, u salah, u piat, ki dawai dachin wot hadooh u brut kyrchut lamieñ, ki sula da chaniah plak da kiwa wan na baar jylla. I jooh yaklam i ya ka rel wow yarap pynduna dor ya ki mar ki mata hanla ym ye ko wow leh lut”, da ong u Mayralborn.

Tangwa da ong u wa emkaam leh ya ki aiñ wow kdoh u khoom yei psiah i mih yong ki bru kiwa na baar khamtam ka Meghalaya Resident Safety and Security Act (MRSSA) 2016 najrong ka Inner Line Permit.

Related posts

Khut ka UDP-West Jaiñtia Hills ya kiwa kwah u yaleh MDC cha ka JHADC

November 25, 2024

Da boonsien dep u yasyllok wa kiwa chongdai madan, phylla u Paul yei pynbaad wa leh yabor

November 24, 2024

“Hei sñiaw yong nga, ka rel kit mar toh u wan ko tangwa ki laad næ ki aiñ wow yada toh u em ki kam ka MRSSA, ILP kawa jooh yaklam na i por cha i por”, da ong u Mayralborn.

Heijooh i por da ong u wa i mih ki thaw khrong poisa ha sarokbah da ktah i ya ki paidbah neibhah wa ki mahajon daw pynkit ki cha ki paidbah deiwa pynku yei dor ki mar ki mata.

Da ong u wa ym man iwa miat wa da boon palat ki thaw khrong dan kiwa da yoo chyrkhei khlem da maap de deiwa ya ksoh kti wei ya e kti.

Heijooh i por, da kyntu u ya ka sorkar wow pynkreh noh ko ya u sarok Nongpoh-Umden-Sonapur uwa jrong 59 Km kawa da angnood ki paidbah ka thaaiñ heiwa da em i mang poisa kawa kamwa Rs. 84 klur.