Da ka thong wow pynduna yei yap ki manbei wa dang kha khon namo ka Maternal Mortality Ratio (MMR) kamjooh i yap ki khon wa dang kha namo ka Infant Mortality Rate (IMR), ka sorkar Meghalaya da mynjur ko wow pyndap noh yei duna ki Doctor wa da dep pyndep yaka puræ pynbniah lane ki Medical Specialist hapoh ka jylla deiwa pynkrehkaam noh da ka laad e sikai hapoh ka ADARSH yow lai puræ Post Graduate Diploma Course. I thong kani toh wow booh da ki thaw puræ ki wow pynlai da ka sorkar hi.
Ya ini daw leh deiwa ya krehkaam lang waka Public Health Foundation of India (PHFI)-Indian Institute of Public Health (IIPH). Hapoh ini, ki District Hospital daw ye ki wow pynkhlam ya ki wakreh yong ki yow yoh ki da ki wakreh wa man kam ki Specialist. Deiwa em kiwa da dep wow puræ yaka kyrdan Post Graduate ha ki Hospital waroh chi snem daw e ko leh yei chakri wa bha ya ki paidbah. Kamtæ ka jylla daw pynkrehkaam ko da ka College of Physicians and Surgeons (CPS) iwa daw e laad ya ka sorkar jylla wow booh thaw puræ ko ya kitu kiwa napoh ka jylla khamtam kitu kiwa da kreh chwa hapoh ka jylla. Ka sorkar da ong ko wa ki CPS man ko kiwi na ki thaw puræ warim dooh neibynta i puræ ya ki kaam sumaar bru hapoh India.
Ka sorkar da ong ko leh wa ha Meghalaya duna i kem ki Specialists kam ki Gynecologist, Paediatrician, Anaesthesiologist wa ki Radiologist kiwa emkaam bha wow pait ya kiwa punkhon kamjooh yow yoh ya ki khon wa chait wa khiah kiwa biang leh i khia kamjooh yow pynkha khon deiwa pooid. Kamtæ da jied ya kini neidaw wa man ko iwa emkaam wow pynkhlan ya ki bru wakreh ha ki phaw snem wow wan.
Hawa klam hajrong kani ka thong krehkaam namo ka Policy, u Sampath Kumar, IAS, Commissioner & Secretary, Department of Health & Family Welfare da ong u, “Kamwa 7000 tylli ki chnong toh kiwa em cha kdong cha chmiang wei chem chitom leh yaka sorkar kamjooh kiwa punkhon wow poi ki cha ki PHC wa CHC kiwa em chajan.” Chooh chooh da ong u wa lada em kawa punkhon kawa toh kawa daw chitom wow kha khon, manda poi ko cha ki thaw sumaar emkaam leh wow em sa ki Specialist ki Gynecologist, Pediatrician, Anesthesiologist wa ki Radiologist pynim yaka bei wa ki khynnah hapoh ka jylla.
Da khana u leh kamwa man kattæ da em 141 tylli ki kaam wa lait tangwa ym em ki Medical Specialists ki wow pyndap ya kini ki kaam wa lait. Chooh chooh da ong u wa wow yoh thaw puræ Post Graduation Specialisation ym toh iwa suk wei da emkaam wow pynsuk noh ya ini yow ye u pynduna yaka MMR wa IMR hapoh ka jylla neidaw wym em ki Specialist. Ka thong toh wa ha kini ki 5-10 snem daw ye wow sikai ya pyn ki yong i hi ki Doctor kiwa daw ye u booh ha ki CHC kiwa em cha kdong dooh leh.
Ka MMR ka Meghalaya toh toh hadien wa em 182 ngut kiwa kha da em kiwa yap ha man ka chi lak sien wa em wa kha khon katwa ka MMR ka ri toh 122.
