Ka Shillong Cricket Association-A da emkaam sa du 3 Wicket yow jop yaka Final ka Inter-District U-23 Men’s Cricket Tournament ha Mendipathar kawa pynman daka Meghalaya Cricket Association deiwa yooluti wow ye u pyndep smat yei kaam mynstep i step.
Hawa kut ka yalehke ynne ka sngi wa ar, ka Tura District Cricket Association-A da yoh ko 64/7 haka Innings wa ar iwa emkaam sa 203 Run yow jop deiwa sah sa chi sngi i yalehke.
Ynne i step, ka TDCA-A da pteiñ ko yaka Innings wa nyngkong yong ka deiwa yoh 47/8 wei da ye ko wow kamai sa du 15 Run yow yoh 62 Run deiwa haap lut ki Wicket, ini da pynman ko yaka SCA-A wow tam da 125 Run hadien wa kamai ki 187/10 haka Innings wa nyngkong. U Abhishek Kumar da yoh u ya waroh ar ki Wicket wa dang sah ka Tura deiwa yoh waroh 8/22.
Haka Innings wa ar, ka Shillong da dam (Declared) ko wow Bat hadien wa yoh 141/8 na ki 33.5 Over. U Ashif Khan da kamai boon dooh u deiwa yoh 26 Not Out, katwa u Manish Sharma da yoh u 4/40 (waroh 10/95) wa u Cham Sangma 3/41.
Ini da booh thong ko yaka Tura-A 267 Run yow jop. Da pynskem yei kdong Run da u Sengpan T Sangma uwa kamai 36 Run wa kynthup ya 6 tylli ki 4 Run wa kawi ka 6 Run, tangwa kiwa wan wow Bat lang wa oo ym ye ki wow kynchew lang. U Swastic Chettri (5/9) da lehbha u da ka bol yaka SCA-A ynne ka sngi deiwa yoh 5 Wicket na ki 15.3 Over, katwa u Kumar (1/14) wa u Bipin Ray (1/26) da yoh ki mar chi Wicket.
