Jowai: Ka Meghalaya State Kickboxing Association (MSKA) da pynbna ko wa arngut ki dkhot yong ka da chah jied ki wow mihkhkmat ya ka ri India ha ka “WAKO Cadets & Juniors World Kickboxing Championship 2018” ka wow pynman nadooh ka 15 hadooh ka 23 tarik u Naikhynde (Sep) ha Jesolo Lido, Venice Italy.
Kiwa chah jied toh ka Ibadarishisha Mukhim ha ka kyrdan Junior Girls Below 48 Kg-Full Contact kawa lai puræ Class XII-Laban Presbyterian HS School wa u Nathaniel Pynbianglang Kurkalang u wow chimbynta ha ka Junior Boys Below 60 Kgs-K1-Rule uwa puræ Class IX ha St. Gabriel HS School, Upper Shillong.
Kini ki ar ngut da chah jied ki hadien wa da yoh takma ki ha ka “WAKO INDIA Cadets Juniors & Senior National Kickboxing Federation Cup 2017-18” wa haka “WAKO INDIA Cadets-Juniors & Senior National Kickboxing Championship 2017”.
Neiliang u Working President ka MSKA da ong u wa hanlada em boon ki bru wa em i sap ha kini ki jait sport tangwa wow lai chimbynta cha ki kyrdan wa heh kiwa pynman cha baar ri emkaam poisa wei duna i yoh yarap ki kamtæ da kyntu u ya ki paidbah wow noh kyllooid yow ye kini ki ar ngut wow wanrah burom ya ka ri wa ka jaitbru.
Kini ki ar ngut emkaam lang ki waroh T. 3,81,000 nadooh ka bai lai, bai wan, bai sah, bai baam yow ye ki u lai chimbynta cha Italy.
Kam wow pynkynmoo wa ini wa dep ki le ngut ki chynrang da dam u lai cha Russia neidaw wym dap poisa ki.
Discussion about this post