Jowai: I kjut wa em ha u bru man i iwa boon jait wei boon hi i por ha ka imlang sahlang uwa em kjut kheiñ i toh uwa kjut khlieh, soohkpoh, iñdoh wa kiwi kiwi, katwa i kjut won wa ktah ya ka pyrkhat pyrdaiñ, i ki bru smat i wow bichaar ya ki dei wa ong toh kiwa da biej.
Kamtæ kam chibynta ka World Mental Health Day, ka yungkrehkaam u District Medical & Health Officer, West Jaiñtia Hills lyngba ka District Mental Health Programme (DMHP) da pynman ki ya ka yalang pynsñiawthooh paidbah heiwa ka phang ha uni u snem toh “Depression: Let’s Talk”.
Yow sñiawthooh chaphang ki jait kjut waphær waphær wa ktah yei pyrkhat pyrdaiñ ki bru nadooh ki khynnah hadooh kiwa tymmen, ka V. Syngon, Clinical Psychologist DMHP da ong ko ymtoh u sñiawthooh bakla ya ki wym em chait i jabieñ, wei ki leh man ki kam kiwi kiwa kjut kiwa emkaam i yarap.
Neibhah kiwa ong ki bru wa yoh ksuid yoh taro waroh kitu toh kiwa chitom naka Schizophrenia kiwa ye u sumaar. Kiwa boon ki jait kjut wa ktah ya ka pyrkhat pyrdaiñ em ki por toh kiwa hiar pateiñ, em won kiwa sdang deiwa kit yeiwa jia heipor khynnah hadooh wa heh khlem klam yeiwa jia, em i por sdang i chitom heipor wa dooh khih dooh khan wa kiwi kiwi ki daw.
Da pyntip ko leh wa hapoh ka District boon ki khynnah wa chimtom na ka Mental Retardation kiwa tlot i jabien ki kamtæ slem ki u sniawthooh ya iwa hikai ya ki.
I tlot i pyrkhat pyrdaiñ em i ha i waroh nadooh i tieñ yaleh exam, i tieñ u klam paidbah wa kiwi kiwi tangwa iwa emkaam dooh toh wow klam chaphang ini waroh.
Hei yatoh wa ka phang ynne ka sngi wa ong “Depression: Let’s Talk” u Dr. E. Dann, Programme Officer DMHP da ong u wa kiwa chitom Depression toh kawa joor bha hapoh India kawa ktah 4.5% ki paidbah wei kiwa yoh Depression hi man ki ki bru wa joor i sñiawsih, i diaw mynsien, ym em kheiñ kordor pyn daki yaki heiwa boon ki por kwah ki u pynkut ya i mynsien yong ki hi.
Da ong u leh wa ki lok ki jor wa yajan kamjooh kiwa ha yung ha sem emkaam wow yaklam ki wa ki yow pynsñiaw chngaiñ ya ki kamjooh wow lai yachem Doctor, wei boon ki por ym emkaam u dih dawai lada biang i kyrchaan kiwa maya ya ki.
Kiwi de kiwa klam ha kani ka sngi toh ka J. Synnah, District Social Welfare Office, u S.C. Laloo ADC uwa man leh kam u kongsan, ka Dr. H.J. Uriah, Specialist Public Health wa kiwi kiwi.
Ha kani ka sngi da saam leh ya ka khusnaam ha ka yakop thoh Slogan heiwa ya ka 1st Prize da jop ka Jaiñtia Higher Secondary School, 2nd Prize Thadlaboh Presbyterian School, Mihmyntdu, 3rd Prize St. Mary Mazzarello HS School. Da saam leh ya ar tylli ki Consolation Prize cha ka Dulong Secondary School wa cha ka Government Girls’ HS School.
Discussion about this post