Ynne ka sngi da sdang krehkaam ka hukum Total Curfew ki bor District ka West Jaiñtia Hills kawa da sdang nadooh 6 waje i miet wow khnang, u khoom, u kdoh yei poor ka khlam COVID-19 hapoh ka District.
Nadooh i step, ynne da sakhi wa ki paidbah da mih ki cha Iawmusiang wow thied ya ki marbaam wa emkaam ki neibhah da em i tieñsar hapyrdi kiwa boon wa lang boi daw khang lut sbak waroh ki dukan hadooh ka 1 Naiynru 2021.
Heiyatoh wa ini i artartien ki paidbah wa boon wow khang ki dukan, neiliang u DC ka West Jaiñtia Hills, u Garod LSN Dykes da pynche u wa ki dukan waroh hapoh ka District u man ki kiwa khang sbak nadooh mynstep ka 22 tarik hadooh ka Dep Sngi Bibar ka 24 tarik.
Da pyntip u leh wa ha ka 24 tarik hadien wa dep chong bichaar bniah yei man i long kani ka khlam ha waroh kawi ka District, daw chim won ya i rai ha i janmiet kani ka sngi heiyatoh wa i wai wa i khang ki dukan kamjooh leh ki yaw wa pynlai da ki Dorbar Chnong.
Neiliang u Garod da kyntu u ya ki paidbah wow man ki kiwa yaichah neibhah deiwa chong yung wei syndong jar jiar i yung daw ye u khang yei poor kani ka khlam, deiwa pynrap leh wa hadooh ka 24 tarik daw chim ya ka rai wa khaddooh hadien wa dep bichaar bniah yei kaam waroh.
Da pyntip u leh wa hadien ka 24 tarik daw ye u chim ya i rai wow chah u wai du ki dukan wa da yohbor hapoh ki chnong khlem chah ya kiwa na baar chnong wow wan thied mar ki.
Chooh chooh da pyntip u wa ha kini ki sngi wow wan (nadooh ka 21 tarik), da khang pyrchah yei lai i wan ki bru hapyrdi ki dong wa ki chnong khnang wow ye u yaleh u pynsangeh yei poor kani ka khlam COVID-19.
Neiliang u Deputy Commissioner ka District da kyrpaad u ya ki paidbah wow man ki kiwa yaichah wei kiwa yakrehlang liang wanang ha kini ki sngi wow wan khnang wow ye hiwot u pyntkut yei poor kani ka khlam kjut.
