Hajrong ka yurim wow kdoh u khoom yei chah ktah palatpood ka bei rymaw ha ki bru kiwa chong wa sah ha ka iwa da wanrah yei maa kylla ya u bru, kamtæ ha ka 14 tarik neiliang ka yung krehkaam yong u Range Forest Officer, Social Forestry Range, Namdong da pynman ki yei pynsñiawthooh paidbah hajrong i rukom im wa yatoh wa u bru wa ki soodong sookun ka bei rymaw wa tip kam ka “Lifestyle for Environment (LIFE)”.
Ya kani ka pynsñiawthooh paidbah da pynman ha chnong Nongrim Bambthong, West Jaiñtia Hills District kawa da pynlai da u M.C. Suchiang, Forester-1, ryngkat i emlang u P. Pachiang, Range Forest Officer, Social Forestry Range Namdong, u P. Khonglah, u Prewis Rymbai kiwa man ki Forester-1, u waheh chnong ka Nongrim Bambthong, u Bichar Khynriam wa kiwi.
U L.D. Suiam Assistant Engineer, Jowai Rural Distribution Division, MePDCL Jowai hawa klam kam u bru chemphang hajrong ka phang “Our Endeavour Today is for a Better Tomorrow” da ong u kani ka phang da khut ko wow ya imlang ryngkat ryngkat wa ka rymaw neibhah waroh ki jait wa im wa da booh da u Blai ha sla pyrthai toh kiwa kordor neibynta wow yoh yei im wa bha.
Na itæ i daw ong u wym hoi u pyndooh ya iyi wa da booh u Blai neibhah u bru hanla em u ha kawon kawon ka kyrdan leh hap hi u wow im ryngkat wa ka rymaw.
Kamtæ, i daw wa chah pynsih pynjæd ka rymaw ha kini ki sngi nadooh ki khloo ki dohum da boh yei maa wa khroo ha ki sngi wow wan.
Hajrong i maa wa yang nei chah lehbeiñ khiar ka rymaw, da khana u wa ki ri ka pyrthai leh da yoo ki yeini wei na itæ i daw ki 169 tylli ki ri wa em hapoh ka United Nations da pynman ki ya ka yalang ha u snem 1994 da i thmu hajrong kammon u kdoh u khoom yei chah pynjæd ka rymaw.
Neitæ da pynkynmoo ya ki laad ki luti wa da chim hajrong i pynduna yei pynmih tdem neibhah i tdem wa mih na ki karkhana da wanrah yei kylla ka suiñ bneiñ wei da ku leh i chit ha ka pyrthai najrong kiwi de ki chah ktah.
Wei ki ri wa rap ku chakhmat hap ki wow smai leh deiwa kular wow kynchew poisa hajrong kammon wow kdoh u khoom yei chah lehbeiñ ka bei rymaw. Heijooh i por wow kular u saam lang yei stat yada rymaw cha kiwi ki ri.
Hawa yatoh wa ini, da khana u wa wot u Montri Rangbahdooh ka ri India, u Narendra Modi leh lyngba ka Life Mission da pynchlur u boon ki laad wow yada ya ka rymaw neibhah ym ye wow im khlem ko.
Kamtæ hawa pynkut da kyntu u wow chim ya ki laad ki luti samen wei wow sikai ya ki khon nadooh na yung yow man ki kiwa tip wow maya rymaw.
Ha kani ka sngi hadien wa da kut ka yalang pynsñiawthooh paidbah da em leh i thung dieñ ha kani ka chnong.
