Ynne ka sngi da pynman ya ka yalang hajrong ka World Water Day, 2021 hajrong ka phang “Save Blue to Stay Green” ya kawa da pynman ha Jal Jeevan Mission, East Jaiñtia Hills District ha Community Hall, Khliehriat West heiwa u Kyrmen Shylla u montri ka chnat bhalang ka jylla, da man u kam u kongsan katwa u E. Kharmalki, Deputy Commissioner da man u kam u symbood kongsan hei emlang u R. Nongtdu, SDO, PHE, Electrical-Rymbai uwa da e ya ki kyntien pdiang burom hei emlang u M. Passah, SDO, PHE, RWS, Sub Division, Khliehriat.
U Kyrmen hawa e yei klam da yaroh u ya u Deputy Commissioner wa kiwi ki chnat ka District kiwa da pynkrehkaam ya ki Water Treatment Project namo ki thaw pynkhooid um ye won u pynemkaam biang ya ka.
Da pyntip u leh wa lyngba ki chnat kam ka Water Resource Department, PHE da pynkrehkaam ki ya kiwa boon ki Project wow pyndap yei emkaam ki paidbah ka District deiwa kyntu ya ki paidbah wow kyrchaan ya ki chnat sorkar wow pynlai bait ya i kreh ya ki Project.
U Kyrmen da kyntu u leh yei emkaam wow pynneh ya ka rymaw, ki khloo wa ki thaw mih um ha ka District neibhah emkaam wa uwi pa kawi emkaam ki wow leh ya iwa emkaam neibynta ka mynried kawa dap wa biang.
Neiliang u E. Kharmalki, da khana u ya ki kreh kam ka Water Treatment Project ha ka District da ka Trinity Implex kawa man ka Pilot Project wow pynkhai im biang ya ka wah Lukha River wa kiwi ki kaam kiwa da leh wow yada ya ki wah wa ka um.
Ha kani ka sngi da em leh ki bru chemphang kam u P. Synnah, Member Secretary, DWSM, East Jaiñtia Hills District, u R. Tongper, Junior Engineer, Water Resource Department wa kiwi kiwi.
Hadien kani ka yalang da lai pait ya i kreh ha ka Trinity Pilot Project, East Side Inn, Jalyiah.
Ha kani ka sngi da em leh ka World Water Day Run kawa da kaweh lama sdang da u Deputy Commissioner, East Jaiñtia Hills District kamjooh leh ka Inter School Exhibition hajrong ka phang “Save Blue To Stay Green”, i rwai da u Charai Bareh wa na ka Holy Infant U.P. School, Latyrke.
