Jowai: Ka World Population Day kawa pynman ynne ka sngi ha Jowai District Hospital, Ialong hajrong ka phang “A New Wave, A New Belief, Families Prosper with Total Responsibilities” man ko kam chibynta wow pynsñiawthooh paidbah yei emkaam u pynkha ya ka manyung deiwa em i kitkhlieh.
Ya kani ka khubor da pynsñiaw cha kiwa wan thooh dawai ha District Hospital yow sñiawthooh ki yei emkaam u yabhah i por chwa wow punkhon yow man ka manyung kawa kmen kamjooh yow lait u kha palat (overpopulation) hapoh ka District, ka jylla waka ri waroh kawi.
U Dr. M. Talang, Joint Director hei klam yong oo ong u wa sñiawthooh hi wa boon ki manyung kwah ki 4-5 ngut ki khon tangwa emkaam wow e por 3 hadooh 4 snem hapyrdi iwi i khon wei ini toh i wym hoi u dam u leh. Deiwa leh kamni e por ko leh ya ki bei ki pa wow sumaar bha ya i khon.
Yow lait i khonboo u khlaad heipor wa kha da pynchlur ya ki bru yow pynman ya ka pynyoo doctor wa tikna kamjooh leh wow kha khon hapoh Hospital.
U Dr. S. Sumer, Gynaecologist, da ban joor u wa emkaam u booh da ka thong wow kha ar namo le ngut donhi ki khon neibhah ka manyung hi wa duna khon man ki kiwa ye u pait u sumaar ya ki khon wei wow e lut ya ki yeiwa emkaam ki.
Da ong u leh ki kynthai ye ki u thap da u Copper T namo dih da ki dawai pyndooh khon yow lait u poi cha i punkhon khlem poi pyrkhat.
Ka Dr. (Mrs) V. Laloo, I/C MCH Officer da pyntip ko wa ya kani ka World Population Day da kynmoo ya ka nadooh ka 11 tarik uni u bnai hadooh 24 tarik uni hi u bnai wei ya kani ka yalang pynsñiawthooh paidbah daw pynman ha ka 13 tatik ha Ummulong Community Health Centre, ha ka 19 tarik ha Laskein Cimmunity Health Centre wa haka 22 tarik ha Jarain Public Health Centre.
Discussion about this post