Ka seiñ JSU Khliehriat Circle ynnin ka sngi da pynskem ko ya ki dkhot wa thymme hapoh ka yung krehkaam ka seiñ ha Khliehriat heiwa chwa ini da em ka yalang wa pynlai da u President ka Khliehriat Unit, u Livingson Sama hei emlang u General Secretary, u Emmanuel Bhoi wa ki dkhot ka EC.
Ha kani ka yalang da emlang u General Secretary ka seiñbei ka JSU, u Treibor R. Suchen heiwa da e u yei klam wa tbian heiwa da ong u wa ka seiñ yieñ ko wow dawa na ka sorkar wow kyruiñ cha ka East Jaiñtia Hills kam ka District kawa wanrah chiboon ka dan neibynta ka jylla waroh kawi tangwa hadooh katni kani ka District da chah ieh khonswet ko ha ka sorkar jylla.
Da ong u leh wa ka seiñ da dawa ko na ka sorkar wow pynbiang paka noh ya ka Civil Hospital, wow e ya ka bhah neibynta u Artificial Turf kawa yoh na ka Khelo India wei wow wanrah ya ka District Library waka Auditorium Hall hapoh East Jaiñtia Hills.
Heijooh i por da ong u wa ka seiñ dawa ko leh wow wanrah ya ka Government College namo ka Extension Campus yong ka Kiang Nangbah Government College hapoh East Jaiñtia.
Ya ki dkhot wa thymme da yahkhmat wow e ya ki kyntien kular da u President ka Khliehriat Circle u Livingson Sama.
