Jowai : U khon wa le naki ynñiaw ngut ki khon u ma Baland Lakiang waka kong Rila Laloo na Loompyrdi Iongpiah, Jowai da wanrah u yei naam wakhhroo yaki em i duna hei doh i pran wa ka jaitbru waroh kawi.
Uni toh u Mai Mai Laloo uwa em i duna hei bor sñiaw næ uwa khlot uwa thloon uwa da em i thrang wow yakhun yow booh yow pynneh yei pyrtuid yong oo yanom kylla rta ha kiwa boon ki liang wei da kha ya oo haka 22.03.1987.
Heijooh ipor da jooh man u kam u President ka Meghalaya Deaf Association wei da jooh lai u leh chabar ri India kam cha Singapore wa cha Australia heipor wadang kreh u waka Ferrando Speech & Hearing Centre.
Hei yaklam ynne ka sngi waka kong Rila da khana ko khajak ka parom chaphang yong oo heiwa da ong ko wa nadooh dang khian u Mai Mai man u uwa thrang u poi chaka thong uwa yakhun la heiwon hiwon i bynta.
U Mai Mai man u uwa jooh lai skur ha Seiñraij High School wei da em u ka sap hei puræ puthi heiwa da poi bait u chaphrang wei hadien wa tip wa em ka skur ya kiwa duna hei doh i pran da thrang u wow li puræ ha kani ka skur wa em ha Mawlai Mawroh heipor wa em u 9 snem i rta. Iwa da pynbood won wow lai skur u ha Bethany society hapyrdi u snem 2002-2007.
U Mai Mai da pyndep u yaka SSLC wei da lai puræ u hadooh BA 2nd Year wei da lai puræ u boon ki thaw puræ kam wow puræ kaam mistri, Computer, Accupuncture wa kiwi kiwi.
Ha u snem 2009 da sdang u u kreh ha Ferrando Speech & Hearing Centre, wa em ha Umiam, Shillong.
Hadien ini da kreh won u ha Endolite Clinic, Malki, kiwa kreh ya kiwa duna hei doh i pran kam ka Artificial Limbs wa kiwi kiwi.
Hei yoh u yaklam wa u Mai Mai lyngba i yarap ka kong Emma Kharkongor kawa man leh kamka Special Educator ha Bethany Society, Shillong u Mai Mai da ong u wada sdang u naka Body Fitness heiwa da jied ya oo wa em sap u ha ini i yalehke hadien ka lympung yakhun-kti ha u snem 2014 ha State Central Library, Shillong khlem yoh i sikai iwon iwon leh.
Kiwa yoo yeini da klam ki wa oo wei da kular ki u yarap ya oo neibhah wa yoo ki wa yakhun u dei bro yong oo hi khlem iwon iwon i sap.
Da ong u leh wa thrang u wow yoh yei naam kam u ma Allan Sunn uwa da rah yei naam yakhun-kti kattu la 11 sien ter ter.
Heiyatoh wa ka lympung 40th National Level Armwrestling Championship ha Nagpur da ong u wa mar ya yoo u yei kmai yei heh kiwa leh pyrchah ya oo dei mynsien wa raikut u da ye u wow pynrem yaki hadooh wa yoh u yei naam wa ar heiwa da chah jied u wow lai yakhun cha Bulgaria haka 1 Naichiphaw hadooh 9 Naichiphaw 2016.
Manka sngi u Mai Mai da pynkhreh u manka sngi kamwa ar kynta chiteiñ wow lai yakhun cha Bulgaria.
Da ong u leh wa em u hei eh i khoo wow lai yakhun cha Bulgaria wow yarap ya oo.
Heijooh i por u Mai Mai kwah u wow kreh neibynta kiwa duna hei doh i pran, kam kiwa tkhoh deiwa e yaki laad wa ye ki u pynemkaam manka sngi.
Ka kong Rila da ong ko wada poi u khon yong ki hanla man u katwa man da ye u wow wanrah yei naam i pyrtuid ka District, ka jylla waka ri hi waroh kawi wei yooluti ko wow wanrah chooh u yei naam wa jop.
Neiliang u Wyrta yooluti wa ki bru samen, ki seiñ, kamjooh leh wa ki tnat sorkar u ye ki u yarap ya u Mai Mai yow poi u cha ka thong ka yong oo tangwa lada ym em i yarap wa khian wa nia hadooh i noh sniwabha kylloid mynsien ki paidbah hadooh ka sorkar ym ye u pynsabut yei saap yong ko ha khmat ka pyrthai.
Discussion about this post