Shillong: Ki seiñ saiñpyrthai ha ka jylla ynne ka sngi da pynman ki yaka yalang wa jhan wow pynsñiaw yei sñiawsih hajrong i khlaad syndet u Lamphang ka yung dorbar uwa man leh u President Rangbah ka United Democratic Party, u Dr. Donkupar Roy.
Neiliang ka Regional Democratic Alliance (RDA) kawa kynthup ya ki ar tylli ki seiñ ri-loom ka United Democratic Alliance (UDP) wa ka Hills State People’s Democratic Party (HSPDP) da pynsñiaw ki ya ka khubor sñiawlem cha ka yung ka sem yong uni uwa yahkhmat wa da khlaad noh.
Neiliang u MLA ka Mairang uwa man leh u montri ka sorkar jylla, u Metbah Lyngdoh da ong u wa ka Party waroh kawi ka phah ko ya i sñiawlem cha ka yung ka sem wei ka Party u emlang ko deilang waka yung ka sem yong u Dr. Donkupar ha kani ka por wa yachem ki ya i sñiawsih.
Da ong wa ka Party daw synran ko hadooh ka sngi wa pynemburom khaddooh ya uni uwa yahkhmat yong ka Party. Ha iwi i liang da ong wa i khlad u Dr. Donkupar da man ko i dooh wa khroo ym du ya ka Party wei kamjooh yaka jylla hi waroh kawi. Da ong leh wa ka Party hadooh katni ym pu em ko u sñiaw ngiat wa da dooh ya uwa yahkhmat yong ka wei da man ko kawa eh wow yoh biang kam u Dr. Donkupar Roy.
Neiliang u General Secretary ka HSPDP, u Renikton Lyngdoh Tongkhar da pynsñiaw u ya i jooh i sñiawsih wei da kynmoo u leh ya ki kaam wa da leh da u Dr. Donkupar Roy khamtam hawa da ye u wow wanrah ka yatylli yong ki seiñ ri-loom ha kani ka jylla.
Discussion about this post