Ka 4th Evening Super-4 Football Tournament 2022 wa pynman da ka Sports & Youth Affairs Committee ka Chutwakhu Social Welfare Local Durbar, Jowai da pteiñ biang ya ka ynne i janmiet deiwa sdang ya ki yakhun Quarter Final kiwa da pynman ar tylli.
Ha ka yalehke hapyrdi ka Dongmihsngi Junior’s waka Mawlong FC, hadooh wa kut i por da thap mar ar kool.
Ya ka Dongmihsngi Junior’s da thap da u Dawan Monmi Mynsong ha ka minit wa 7 wa u Ewanmi Da-oo Langstang ha ka minit wa 23 katwa ya ka Mawlong da thap da u Primrose Lamat haka minit wa 46 wa u Praysinghim Jungai ha ka minit wa 50.
Kamtæ yow yoh ya kiwa jop da pynman da ka Penalty Shootout wa jop da ka Dongmihsngi Junior’s da 2-1.
Ha ka Quarterfinal wa ar, ka Future XI da jop ko ya ka Jayden’s da 2-0 da ki kool wa thap da u Ruben Lamin haka minit wa 16 wa u Kenite Bareh haka minit wa 47.
Ki Quarter Final wa bood u pynman ha kani ka 16 tarik hapyrdi ka RARR FC waka Spartan heipor 5:30 i janmiet wei daw pynbood daka Progressive 7 pyrchah yaka Carpe Diem heipor 6:30.
