I kaam wow pynkhai-im namo ka Rejuvenation ya ka Wah Myntdu man iwa kongsan bha ha ka juk wa katni wei ka lyngkor hi chong ko ha ki Montri waka sorkar jylla hi, heiwa ynne ka sngi u Montri ka chnat PHE, u Renikton Lyngdoh Tongkhar da khana u wa katni i kaamram wa khroo yong ka PHE hi toh wow pynpoi ya ka um cha ki paidbah katwa yow pynkhai-im da hap wow krehlang wa kiwi ki chnat sorkar.
Hajrong ki kaam wa yillu wa yatoh wa i rukom yada ya ki rood wah, ki thaw wa mih um (Catchment Area) yong ka Wah Mah Myntdu, neiliang u Renikton da ong u wa em i krehlang wa kiwi ki chnat sorkar kam ka Soil & Water Conservation wa kiwi ki chnat heiwa da yarap jubab noh u C Riboon Challam uwa man leh kam u Chief Engineer ka PHE, heiwa da ong u wa da sdang yei kaam ha ka Wah Ganol neibynta ka Tura wei heiyatoh wa ka Jowai daw thooh ya ki laad wow wanrah ya ka Sewage Treatment Plant neibhah wa da pyrchang chwa yeini neibynta ka Shillong Water Supply Scheme wei i jooh ha Umsohlang, Mawlai wei lada man iwa jop ha Umsohlang tæ daw leh i jooh ha Jowai.
Da ong wa kamwa man kattæ waroh ki jakhlia toh kiwa tooid bait cha ka wah wei yeini da kwah wow pynkhooid noh wei oo man u uwa bahkhlieh yei khooid ka um ha Jowai wei yow wanrah ya kani ka Treatment Plant.
Da kdaw u leh wa iwa joor i jakhlia wa tooid cha wah Myntdu toh iwa na thaaiñ Mynthong iwa lai bait cha ka wah heiwa da emkaam wow pynkhooid chwa ya i jakhlia chwa wow poi i cha ka Wah Myntdu kamjooh da ong u leh wa um wa wan na Mynngot leh man ko kawa jngud wei daw ya krehlang wa kiwi neibhah ini waroh toh ki jakhlia wa da pynmih u bru wei hap wow sumaar i ya ka um wa da de da u Blai.
Da pynkut u deiwa ong wa ha Umsohlang leh man i jooh i chitom wa lai bait i jakhlia cha ka um wei lada krehkaam iwa da pyrchang daw wanrah ki cha Jowai leh.
Puræ leh: Chimbynta u Conrad wow pynkhooid ya ka wah Umsohlang-Umshing
