Ka Synjuk Waheh Chnong Ri Jaiñtia (SWCRJ) da pyntip paidbah ko wa daw khut ko ya ka yalang bah yong waroh ki Waheh Chnong wa ki Life Member na Ri-loom Jaiñtia (East wa West Jaiñtia Hills) ka wow man ha ka 11-12-2021 ha Community Hall ka Khliehriat West, East Jaiñtia Hills District heipor 10:00 waje i step.
Kani ka yalang daw kynthup ko nadooh ki chnong wa man sor wa ki palatsor wow wan chimbynta wow pyrkhat ya ki kaam wa yatoh wa ki Dorbar Chnong wa ka jaitbru hi waroh kawi.
I thmu wow pynman ya kani ka yalang toh hajrong ka yurim wow yaklam heiyatoh wa ki kaam pynroi, ki kaam bhalang wa kiwi ki kaam wa yatoh wa i bha i miat ka jaitbru.
Ha kani ka yalang daw pynsñiaw leh ya ka bui krehkaam ka Synjuk yong u snem 2019-20, wow pynlang ya ka yarong poisa ka Synjuk na ki Dorbar Chnong yong u snem 2019-2021, wow pynkhlan ya i rukom krehkaam ki chnat ka Synjuk ha East wa West Jaiñtia wa i rukom pynman ya ki Fete ha u snem 2022.
Chooh chooh da pynsñiaw leh wa daw yaklam hajrong ki kaam wa yatoh wa i rep i riang, kammon wow kyntu kynrong ya i yoh i laa ki paidbah wa kiwi kiwi.
Ini toh katkam wa pyntip u President ka SWCRJ u A. Lypon hawa yaklam wa kiwa pathai khubor ynne ka sngi.
