Ka seiñ ki sahep ka MeECL kawa tip kam ka MeECL Engineers Association ynne ka sngi da thoh ko cha u Chairman cum Managing Director ka MeECL wow dawa thung kreh namo wow pynsangeh noh ya ka hukum beh kreh chipor (Suspend) ya u H. Jywa uwa man kam u Superintending Engineer.
Ka seiñ da yachem ko ha ka 5 tarik uni u bnai wow pyrkhat yeini i kaam wei da yaroh ko ya ki kaam wa ki kreh wa e chakri u Jyrwa ya ka chnat.
Da ong ko leh wa i hukum wow beh kreh chipor ya u Jyrwa toh iwa ymye u pdiang da ka seiñ.
Kamtæ ka seiñ daw pynman ko ya i yakhih deiwa pyndait lama yong wa i rah Placard wa i kdoh Banner ha ka 11 tarik uni u bnai ha ki yung krehkaam, ki Power Station wa Sub Station ha kylleiñ ka jylla.
Ini i yakhih wa jaijai ym ktah i yei kreh kani ka chnat wei ki sahep ha ka Head Quarter Shillong daw sdang ki yei yakhih deiwa kbai (Sloganeering) ya ki kyntien dawa ka seiñ nadooh 1:00 waje hadooh 2:00 waje i sngi.
