Ka Ministry of Civil Aviation da pyntip ko wa deiwa pyrkhat yei emkaam yei ye u lai ki lieñsuiñ yow pynyabi yaka nongbah ka Arunachal Pradesh, kamtæ neiliang ka Airport Authority of India (AAI) da sdang ko yei kreh wow chna ya ka Greenfield Airport ha Hollongi iwa jngai 15 Km na Itanagar. Wei da mang T. 645 klur yow chna ya kani ka Aiport waroh kawi nadooh ki thaw wa em chajan.
I thmu toh wow chna ya ka Airport wa ye u hiar ki lieñsuiñ A-320 wei hadien won u pynjrong ya ka sarok hiar lieñsuiñ sa 500 mteer yow ye u hiar sa ki lieñsuiñ A-321. I thaw toh iwa heh 4100 sqm, katwa ka thaw psiah ki bru namo ka Terminal Building ka Airport toh kawa ye u pdiang 200 ngut chisein pdiang heipor wa boonkaam dooh. Daw em leh 8 tylli ki Check-in Counter heiwa ka Terminal Building u man ko katkam ka juk kawa katni.
I sdang wow chna ya kiwa emkaam chwa cha rood da pyndep hadooh 80%. Ya ka Terminal Building wa chipor da dep 30%. Wei ya kani ka Airport da mang wow krehkaam noh ko ha ka 15-08-22.
Kani ka Aiport yow man ko kam ka Greenfield Airport daw em ko leh yei rukom pynlang umslap wa i yirngam ha kylleiñ sooding. Daw em ko leh ya ka ATC Tower deilang waka Technical Block, Fire Station, Medical Centre wa kiwi de.
Ya i dur leh u pynwandur wow yahaap katkam wa man ka rymaw yow pynmait chooh chooh yeiwa da em chwa yow man ko leh kawa jai-jai hawa wan ki bru.
Neiliang u PM Narendra Modi da ong u wa ka Arunachal Pradesh toh ka luti wow lai cha South East Asia wei emkaam ko ya iwa boon iwa thymme katkam ka juk katni deiwa em leh ka nongbah ka jylla ya ka Airport kawa yarap leh ya ka khayi pateiñ ka thaaiñ.
Ka Arunachal kattæ da em ko ar tylli ki Airport kawi ha Tezu, Lohit District wa kawi ha Pasighat, East Siang. Tangwa kawa em ha Hollongi daw man ko kawa heh dooh wei ka sorkar pyrdi da kular ko wow e sa le tylli ki Airport kawi ha Dirang, West Kameng, kawi ha Anini, Dibang Valley wa sa kawi ha Upper Subansiri District.
