U montri rangbah ka jylla, u Conrad Sangma ynne da pyntip u wa u montri rangbah ka Assam, u Himanta Biswa Sarma daw wan u cha Shillong ha ka 23 tarik uni u bnai wow yaklam pynbait ya u pood hapyrdi kini ki ar jylla wei hadien ini daw lai won u (Conrad) cha Guwahati wa u Himanta wow yaklam hajrong kani ka jooh ka phang.
U Conrad da pyntip u wa ini i wan u Himanta toh chi sngi chwa u wan u montri ki kaam pohyung ka sorkar India, u Amit Shah cha Shillong heiwa daw em ka yalang hapyrdi ki montri rangbah, ki Chief Secretary wa kiwi ki heh sahep na kini ki ar jylla.
Kam wow kdaw heini, ha ka 17 tarik uni u bnai u Conrad chirup wa ki montri ka jylla wa kynthup ya u Banteidor Lyngdoh wa u Hamletson Dohling wa u Chairman ka State Planning Board, u Lambor Malngiang da yachem ki ya u Himanta ha Guwahati heiwa da em i yaklam hajrong ki kattu katni ki phang wa yatoh hajrong kini ki ar jylla.
U Conrad da ong u leh wa katni da toh i por wow sdang thymme hajrong kini ki kaam khnang wow ye u lai ki kaam chaphrang.
