Ka Seiñ Kur Dkhar Wapung Circle daw pynman ko yei saam khusnaam cha ki khon khynroo khyllood ka kur kiwa da lehbha haka SSLC, HSSLC, Graduate, Post Graduate wa Professional Courses wei yeini daw pynman haka 30 tarik uni u bnai (Dec) ha ka chnong Mookhep heipor 10:00 waje i step.
U President ka Seiñ Kur Dkhar, u Shaniahskhem Dkhar da pyntip u wa ini i pynkup burom toh neibynta ki khon khynroo kyllood na ka Seiñ Kur Dkhar kiwa haap ha Wapung Circle kiwa kynthup yaka Jalyiah, Khlieh Myntriang, Wapungskur, Wapungshnong, Pamrapaithlu, Pamrakmai, Mokhep, Iongkaluh, Sohkymphor waka Lum Mulieh.
I thmu ini i pynkup burom toh yow e mynsien ya ki khon khynroo yong ka kur wow nang lehbha ki haka puræ puthi yow wanrah burom yaka kur ka chnong, ka thaw wa yaka jylla hi waroh kawi.
Ki khon khynroo kiwa chah pynkup burom toh du ya kitu kiwa da dep pynpoi ya ki Mark Sheet yong ka SSLC, HSSLC, Graduate, Master, Professional Course wa kynthup yaki MBBS, Lawyer, Engineering wa kiwi de.
Neiliang ka Seiñ Kur Dkhar Wapung Circle da khut da wer ko ya ki para kur wow embynta ha kani ka sngi nadooh ki bei ki pa, ki khon khynroo wa ki kni ka kur khnang wa ka pynkup burom yong ka kur u man ko kawa chongkun wei kawa jop.
Discussion about this post