Shillong: Uwa yahkhmat ka Peoples’ Democratic Front (PDF) uwa man leh montri ha ka sorkar, u Hamletson Dohling da ong u wa ka PDF da em chwa ko u kyrtong neibynta ka election MP ka wow man ha u snem wow wan, wei ya ka rai wa khaddooh daw pynbna da ka Central Working Committee (CWC) ka party ka wow man ha ka 5 tarik uni u bnai.
Hawa yaklam wa kiwa pathai khubor ynne ka sngi, u Hamlet da ong u wa hadooh katni ym em ki bru kiwa na baar kiwa paan ticket na ka PDF, tangwa ka party da em chwa u bru ka party neibynta ka election MP na Shillong wei hadien ka CWC ya ka rai daw tyrwa hakhmat ka yalang ka MDA.
Hawa kylli yei pyrtuid u kyrtong wa ka party u yaklam ko ha ka CWC neiliang u Hamlet da kyntait u wow khana yeini deiwa ong wa chong i ha ka rai ka CWC.
Da ong u wa waroh ki party kiwa emlang ha ka sorkar em ki ya ka hok wow sai ya u kyrtong wei wow tyrwa cha ka MDA Co-ordination Committee wow yoh yei mynjur lang.
“Waroh ki party em hok ki wiw sai ya ki kyrtong neibhah em bait ki bru wa biang, haap nood kam ka party wow chim rai neibynta ka election khamtam kam ka PDF kawa dang chi snem, tangwa hawa em i ha ka sorkar synrop haap wow burom leh ya kiwi ki party lada kwah ki ya u kyrtong monlang,” da ong u Hamlet.
Chooh chooh da ong u wa lada kwah ya u kyrtong monlang na ka sorkar MDA waroh ki party wa em ha ka sorkar u sai ki ya jar jiar u kyrtong wow tyrwa hakhmat ka sorkar synrop wei ka rai wa khaddooh chong ko ha ka MDA Co-ordination Committee.
Hawa jubab yei kylli, lada ka UDP da tyrwa ko namo ymem ya ka PDF wow kyrchaan ya u kyrtong wa da pynbna ynnin ka sngi da u Dr. Jemino Mawthoh, neiliang u Hamlet da ong wa hadooh katni ympu em iwon iwon i paan kyrchaan ka UDP.
Discussion about this post