U Lahkmen Rymbui, Montri ka sorkar jylla uwa man leh u MLA ka Amlarem Constituency hawa klam haka yalang pynskem ya kiwa ksoh kaam ka Youth Wing 7-Amlarem wa da pynman ha Amlarem ynne ka sngi, da sngoh joor u yei pynbaad wa pyrchah ya oo iwa ong wa oo ym em leh u iyi iyi ha kini ki 5 snem.
Wei katwa u Lahkmen dang klam u, da sakhi wa ki paidbah leh da pynchah chkur bha ki yei klam yong oo.
Kam uwa mihkhmat ong u wa oo ym em pait u du yaka Amlarem tangwa yaka jylla hi waroh kawi neibynta u wanrah i roi i paar hapoh ka Constituency waka jylla waroh.
Ong u wa da sñiawhun sakhiat u yaki chnat krehkaam wa ksoh u hapoh ka sorkar neibhah da ye u wow leh boon ki kaam pynroi wa yatoh wei puræ puthi, wei da ye u wow mang boon ki Police Station, ki Border Outpost najrong wa dadep soi haroh u neibynta u pynku i su cha ka T. 2000 ya kiwa chet ja sngi ha skur.
Heiyatoh waka Amlarem Constituency won ong u, hanla kiwi beiñ kynthah ki, tangwa i sakhiat yong i roi i paar da chynna haki chnong ki thaaiñ ka Constituency nadooh ki skur, ki sarok, ki luti syngkieñ, ki kaam uiñke suwari, i pynku kyrdan yei thaw sumaar, i pynbha pynmiat yaki chnat krehkaam wa kiwi kiwi de.
Da pynsñiaw haroh u ki kaam pynroi wa sahteiñ heipor wa rem u, wei hadien wa jop u ha u 2018 da pynmankaam lut u ki.
Kamtæ kyntu u yaki paidbah wow bichaar yaki kaam heipor wa man MLA u, wei heipor wa man da kiwi neibhah emkaam u yoo u klam yei sakhiat wym toh u chah pynbiej ha kiwa thlah hawa pait.
Ong u leh wa ka nong yong u paidbah toh ki kaam pynroi deiwa yooluti wa kitu kiwa em i yoo jngai wym em de wa ye u pynbiej ya ki, kamtæ booh thong u wa ka Election 2023 toh ka wow sakhi wa katwon ngut kitæ kiwa maya yei roi i paar.
Ya kiwa ksoh kaam ka Youth Wing ha kani ka sngi da wan pynskem da u President ka State Youth Wing UDP, u Kyrmen Shylla uwa man leh u MLA ka Khliehriat kamjooh u Montri sorkar hei emlang u Pius Marweiñ, MLA ka Ranikor uwa man leh u Working President State ka Youth Wing UDP wa kiwi.
U Pius hawa klam hajrong ka Party UDP ong u, boon ki paidbah pynbaad ki yaka UDP hawa jia iwon iwon i eh i jynjar haka jylla, tangwa heipor Election won mylliñ ki yaka UDP, kamtæ i em ki du 8 ngut hapoh ka sorkar ong u wym ye ki u leh iyi iyi yow pynmankam yei kwah ki paidbah.
Kamtæ kyrpaad u yaki paidbah wow e ki i kyrchaan pura yaka UDP khnang yow ye ko u yah samen yaka jylla wei yow yoh pynmankaam yei kwah yong ki.
Neiliang u Kyrmen Shylla won yaroh u yei stat i chemphang u Lahkmen Rymbui hapoh ka sorkar MDA heiwa da ye u wow wanrah yei bha i miat hapoh ka chnat wa oo pait u.
Ong u wot ya oo hi leh yoh u chiboon i sikai i e yumut na u Lahkmen, kamtæ kyntu u yaki paidbah ka Amlarem Constituency u kyrchaan biang ki oo neibhah wa ki toh kiwa embhah tam u yoh kam uni uwa mihkhmat wa stat wa chemphang.
