Ynne ka sngi ka sorkar MDA hapoh ka jylla da lehwarom ko yei dap 4 snem yong ka heiwa da em ka yalang wa man ha Soso Tham Auditorium, Shillong heiwa da emlang u Montri Rangbah ka jylla, u Conrad Sangma kamjooh ki Montri ka sorkar jylla.
Ha kani ka yalang neiliang u Conrad hajrong wa pynbna u ya ki kaam wa da leh da sorkar ha kini ki soo snem wa dadep da pynbna u leh ya ki kaam pynroi wa ka sorkar da leh ko kamjooh leh ki kaam wa da sdang ko ynne ka sngi.
Ynne, u Conrad da pynbna u wa da sdang ya ka Early Childhood Development & Maternal Health Helpline ‘14410’ kawa nyngkong dooh kam kani ka jait hapoh ka jylla hajrong ka thong wow yarap ya ki manbei wow poi smat ki cha ki thaw sumaar wa em chajan dooh kamjooh leh yei bha i miat ki khynnah khonboo wa ki manbei wa dang dep kha khon.
Da wai paidbah leh ya ka Chief Minister’s Safe Motherhood Scheme heiwa lyngba kani da yooluti wa daw pynduna yei yap ki manbei heipor wa kha khon hapoh ka jylla.
Da sdang leh ya la ASHA Payment Gateway wow pynsuk ya i rukom su ya ka nong ya ki ASHA.
Ha kani ka sngi chirup wa u Montri ki kaam pynroi palatsor da sdang ya la Aspire-2 waka Skills Meghalaya Programme wow pynchlur ya ki khyroo neibynta ka mynstep ka mankawi.
