Jowai: Ka Jaiñtia Students’ Movement (JSM) Central Body ynnin ka sngi ka 30 tarik da yoh laad ko wow wai ya ka yungkrehkaam wa thymme yong ka ha chnong Khliehmyntriang, East Jaiñtia Hills District.
Ini i wai ya kani ka yungkrehkaam ha kani ka sngi man ko kam chibynta wow kynmoo warom ya ka lyngkhooh snem 155 wa da khlaad u khlawait ka jaitbru Ynñiawtrep u Woh Kiang Nangbah ha kti ka sorkar pharæng deiwa pasi ya oo ha Iawmusiang, Jowai ha u snem 1862.
Ha chwa u wai ya kani ka yungkrehkaam da pynman ya ka yalang wa kyrpang hei emlang u Kyrmen Shylla kam u kongsan wei da emlang leh ki dkhot na waroh ki Circle wa ki Unit ka seiñ na East Jaiñtia Hills.
Ya ka yalang da pyllai da u Skhembhalang Dkhar uwa man kam u Publicity Secretary Ka JSM seiñbei da yoh ya i klam pdiang na u Phaitmon Nongtdu uwa man kam u Working President wei da pynbood sa u President ka seiñ u Leningstar Rymbai.
U kongsan hei klam yong oo da yaroh u ya ki kaam wa ka seiñ da dep lai luti deiwa e leh ya kyntien snieñ wa i kyrkhu kyrdoh ya ki dkhot waroh.
Da pynkitbok leh yei lai luti ka seiñ wow dawa College sorkar hapoh East Jaiñtia Hills District khnang wa ki khynnah khynroo wa puræ yong kani ka district yow ye ki u pyndep ya ka puræ puthi yong ki.
Discussion about this post