Jowai: Ka yalang pynsñiawthooh paidbah heiyatoh wa ki kaam bordiñ wa chem chitom ki paidbah da pynman ya ka ynne ka sngi ha District Library Auditorium, Mynthong, Jowai ya kawa da chongknor da u R. Rapthap Deputy Commissioner ka West Jaiñtia Hills District, Jowai.
U W.M.S. Pariat, IAS, (Retd) uwa man kam u Chairman ka Meghalaya State Electricity Regulatory Commission (MSERC), Shillong, ka L. Kharkongor, IAS (Retd), Chairperson ka Consumer Grievances Redressal Forum, Shillong, u S.J. Laloo, Ombudsman, Meghalaya State Electricity Regulatory Commissioner, Shillong, u S.C Laloo, Additional Deputy Commissioner West Jaiñtia Hills, S.B. Umdor CEO MePDCL, Jowai da emlang ki ha kani ka sngi.
Ka MSERC, Shillong hei ya krehlang wa u Deputy Commissioner ka West Jaiñtia Hills District, Jowai da pynman ki ya kani ka yalang pynsñiawthooh paidbah yow che kamjooh yow sñiaw yei ood ki paidbah hei yatoh wa kiwa boon ki kaam heiwa da wan embynta lang ki waheh chnong, ki Secretary chnong kamjooh kiwi kiwa mihkhmat ki chnong hapoh ka District.
U W.M.S Pariat, Chairman ka MSERC da klam u chaphang ka aiñ Electricity Act 2003, ka aiñ wa pait yei pynmih bordiñ, u saam bordiñ kamjooh wow khayi ya ka bordiñ.
Da ong u wa emkaam wow su tista ya ka bai bordiñ yow ye leh u e cha ki ya ka chakri wa bha wei lada ym em iwon iwon wa ym hun ki, ye ki wow ujor deiwa kynmoo leh ya ka Registration Number ka ujor yong ki wei lada ym em hun ki yeiwa kreh ka MePDCL ye ki leh u wanrah ya ka ujor hakhmat ka Commission wa em ha Shillong.
Ha kani ka yalang da yoh u sñiaw ya kiwa boon wa ood ki paidbah nadooh i wym biang i poi ka bordiñ, ym biang i poi ka bai bordiñ wei ym em biang i wan pynchna manda sih iwon iwon wei neiliang kani ka tnat da kular ko wow chimkhia ya ini waroh.
Discussion about this post