Ha ka sien wa ar chah jied biang u Moonlight Pariat kam u CEM ka JHADC

Jowai: Hadien wa dooh noh u A.A. Shullai ya ka chuki CEM hadien wa wanrah ya ka No Confidence Motion heiwa 17 ngut ki MDC da yieñ ki wow pynyoo wa ym em de kyrchaan ki ya u Shullai kam u CEM, neiliang u Chairman u Arbor Hima Darnei katkam ki bor wa da pynkup ha oo da pynbna u wa da man thylli ka chuki u CEM wei da khut u leh ya ki MDC wow tyrwa pyrtuid ki ya u MDC wa hun ki wow man kam u CEM.

Ha ini i tyrwa pyrtuid da mih du i pyrtuid u Moonlight Pariat wei da jop u wow man kam u CEM wa thymme ka JHADC kawa man ka sien wa ar wa ksoh u ya ini i kyrdan.

Da em le ngut wa tyrwa yei pyrtuid yong u Moonlight wa kyntup ki ya u Desceous Pohshna kawa kyrchaan da u Shemok Garod, da tyrwa leh u Laitsingh Shylla kawa kyrchaan u Hermon Phawa wei da tyrwa leh u A. Andrew Shullai kawa da kyrchaan leh da u Holando Lamin.

Neiliang ki MDC wa da yieñ e khublei ki ya u CEM wa thymme, u Pasmon Dkhar da ong u wa yooluti wa i krehkaam u CEM u man i iwa salonsar i wym pait chilliang.

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

U Joinriwel Pyrtuh won da yooluti u wa daw ye noh u pyndep ya ka Iawmusiang Market Complex, u Andrew Shullai da ong u wa u Moonlight Pariat toh uwa biang wow man kam u CEM wei uwa da chemphang wow yahluti ya ka JHADC wei da kyntu u leh ya waroh wow man kiwa ya tylli wow krehlang.

U Chanky Lyngdoh won da ong u wa u CEM wa thymme toh uwa biang bha uwa da jop MDC la 5 sien khlem chah pynrem wei ha kini ki snem heipor wa chong u ha ka liang pyrchah da wanrah u boon ki phang kylli iwa pynyoo wa man u u bru chimkhia ya ki kaam ka Council.

Kiwi de kiwa klam e khublei kyntup ki ya u Kilometer Lytan, u Thombor Shiwat, u Desceous Pohshna, u Laitsing Shylla, u Philip Tangliang, ka Violet Lyngdoh, u Hopingstone Bareh wa kiwi.

U Chairman leh da yaroh u yeini i yatylli ki MDC wow tyrwa du iwi donhi i pyrtuid.

U CEM wa thymme da e khublei u ya ki MDC wa kyrchaan ya oo hanlada joor ki bor wa mut u taan ki charood. Da pdiang u leh kam u CEM wa ka Council em ko hei chitom poisa wa joor bha wei u pyrchang nyngkong u wow pyllait ya ka tulop 2 bnai, u thooh ya ki laad wow pynmih poisa wow pyndep chna ya ka Iawmusiang Market Complex heiwa ka poisa bynta wa ar namo ka 2^nd Installment ym poi de ko la 9 snem.

Kamtæ da kyntu u ya waroh ki MDC wow krehlang ki yow ye u pyndep ya kiwa boon ki kaam ka JHADC wei ym toh u siam thlu yow lait ka JHADC u ngam.