Ynne ka sngi da man ko ka sngi wow sahkynmoo ya kiwa rep ka West Jaiñtia Hills heiwa da sdang pyrchang wow kit ya u Chyrmit Lakadong da ki Drone ha chnong Mulieh, West Jaiñtia Hillls.
Ya u Chyrmit Lakadong da jied hapoh ka One District, One Product (ODOP) yong ka Department for Promotion of Industry and Internal Trade (DPIIT) yong ka Ministry of Commerce & Industry, heiwa uni u chyrmit toh uwa da rep du ha West Jaiñtia Hills wei man u u mar uwa kyrpang wa uwa miat bha hadooh wow chalan ya oo.
Ka ODOP da kreh ko chirup wa ka AGNIi Mission, kawa man kawi na ki Mission hapoh ka Prime Minister’s Science, Technology and Innovation Advisory Council kawa da jied ya u Lakadong Turmeric kam u mar wa kyrpang, heiwa daw sdang pynemkaam noh da ki Drone wow kit ya u Chyrmit Lakadong ha ki bynta wym lait de ki kari wow lai.
I pynemkaam da ki Drone daw yarap ko wow pynlait nei lutphut wow kit u bah ya ki mar iwa daw pynduna leh yei lutphut kiwa wan thied.
Ha ka yalang ynne ka sngi ka Sumita Dawra, Additional Secretary, DPIIT da ong ko wa ka ODOP toh kawi na ki thong krehkaam u Montri Rangbahdooh ka ri, heiwa ynne ka sngi man ko ka bynta wa nyngkong wow pynyoo ya ki laad ki luti katkam ka i stat ka juk katni.
U Chyrmit Lakadong toh uwi na ki jait chyrmit wa miat dooh ha pyrthai heiwa em u 7-9% u Curcumin (katwa kiwi ki jait chyrmit em ki du 3% næ duna). I em boon i Curcumin ha u chyrmit pynman i ya ki bru wa ki karkhana u dawa bha ki ya uni u jait chyrmit.
Ka India man ko kawi na ki ri wa khlan dooh u chalan ya u chyrmit (APEDA, 2019) heiwa da ku i chalan cha ka US$ 236.5 Million ha u 2018 na ka US$ 182.53 Million ha u snem 2017.
Du ha u Naitung (Apr) 2021 ka ODOP Team da dai ko hadooh 13,136 kg u syiñ chyrmit cha ki karkhana kam ha Ernakulam, Kerala wei hapoh ka ODOP i dor u Chyrmit Lakadong da ku i da T. 20, heiwa ha u 2021 i dor man i T. 150 chi Kg katwa ha u 2022 won T. 170 chi Kg.
Ka ODOP da yarap ko wow pynpoi ya uni u mar cha ki yaaw heiwa da ye u yarap ya ki 500 tam ngut kiwa rep wa ki Self-Help Group kamjooh ki Co-operative Society na ki soo tylli ki chnong.
Ka Sumita Dawra da ong ko leh wa hapoh ka ‘Lakadong Turmeric 2.0’, daw pyrchang wow pynboon i thied ya uni u mar ha uni u snem wa ki snem wow wan. Heiwa ka ODOP Team da wan ki cha Meghalaya ha u Kmaichonglad (Dec) 2021 heiwa da yoh u yachem wa kiwa dai wa kiwa rep ya uni u syiñ.
Heijooh i por da yaroh ko leh yei rukom krehkaam ka chnong Mulieh wa kiwa rep kamjooh heiwa da em i rap kylliang chaan kylliang wei yeini i rukom krehkaam daw rah daw khana ko cha kiwi ki thaw.
Ka Trinity Saioo hawa e i klam ha kani ka sngi da ong ko wa man i kam cha yimphoo neibhah wa uni u Chyrmit Lakadong da pawnaam bha u ym du hapoh ka District næ ka jylla tangwa ha ka ri wa ka pyrthai hi waroh kawi.
Da khana ko wa da sdang ko u kreh wa kiwa rep nadooh u snem 2003 heiwa da ye ko u thooh yarap na ka Spice Board yow yarap poisa (Grant) khamtam wow thied ya ki symbe. Da ong ko wa hanlada man ko kawa sikai skur leh tangwa mar kut skur da pynlait por ko wow yarap ya kiwa rep heiwa kammon wow pynku wow pynboon ya i rep chyrmit.
Da khana ko ya ka luti wa da lai ko heiyatoh wa i rep wa i khayi ya u Chyrmit Lakadong.
Ha kani ka sngi da pynyoo leh yei rukom pynkrehkaam ya ki Drone hawa kit ya u Chyrmit Lakadong na iwi i chnong cha iwi tawon wei da em leh i yaklam batai hajrong ini i bynta.
Ya kani ka sngi da pynphooh leh da i Chaad Pliang na ki manbei ka chnong Mulieh.
