Ha ka sngi wa pynlait biang wow dai dakha, wanpoi hadooh kamwa 15 ton ki dakha ha Shillong

Shillong: Ka yaaw dakha da sdang biang ko ynne ka sngi hadien wa chah khang i wanrah ya ki na baar jylla la kamwa chi bnai kattu, neidaw wa chem yei dawai Formalin wa da Inject ya ki dakha wa pynpoi cha ka jylla yow lait ki u pyut.

Ynne ka sngi ka yaaw dakha ha Iewduh da sakhi wa kiwa dai dakha da dap ki dei mynsien wa kmen hadien wa da yoh biang ki u kreh yei kaam wa da imja ki waroh chi kattu.

Hawa yaklam wa kiwa boon, da pynsñiaw ki yei mynsien sñiaw ngooh ya ki bor wa pait ka sorkar, wa da ye biang u wanrah næ chalan biang ya ki dakha na baar jylla.

Du ynne ka sngi da wanrah chi truck piah ya ki dakha ha Iewduh wa da chalan won cha kylleiñ ki thaw ka ka jylla.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

U President ka Khasi Jaiñtia Fish Wholesellers and Retailers Association (KJFWRA), u Mitchell Wankhar da pyntip u wa ynne ka sngi, da wanrah chi truck piah ki dakha na Andhra Pradesh wa na Assam.

Katkam wa ong u Mitchell, ki dakha wa da wanrah na baar jylla ynne ka sngi da kynjoh i cha kamwa 15 ton, wei ya kini da dai kilo ha i jooh i dor wa jooh dai ha kini ki bnai wa dadep wei yei dor thymme daw pait ha ki sngi wow wan katkam wa man ka yaaw.

“Ynne ka sorkar Andhra Pradesh da pynkhor bha ko yei rukom chalan dakha deiwa sylli (test) ha waroh ki nan wa ki thaw song dakha wow pyntikna wa ki dakha wa chalan cha baar toh kiwa khooid kiwa lait nei dawai” da ong u Mitchell.

Da ong u wa neiliang kiwa khayi wa kiwa dai dakha ha kani ka jylla leh kwah ki wa ka sorkar Meghalaya u sylli man lei por khnang wow wanrah yei chngaaiñ ya kiwa baam dakha ha kani ka jylla.

Ha iwi i liang, da yoh wow yaklam wa ki kattu katni kiwa dai dakha kiwa da pynsñiaw yei mynsien wa kmen neibhah da yoh biang u chongdai handien wa da chah khang la kamwa chi bnai kattu.

U K. Langstieh uwi na kiwa dai dakha, da ong u wa hadooh i por 12 waje i sngi, da ye u wow dai hadooh kamwa 30-40 kilo ha kani ka sngi pynlait biang wow dai dakha.

Da kyntu u leh ya ki paidbah wa ymtoh wow artatien ki wow wan thied dakha neibhah ym em de iwon iwon kamwa man ha ki sngi wa dadep.

U A. Diengdoh da ong u wa kam kiwa dai dakha ym em iwon iwon i leh buittooh ki wow e dawai ya ki dakha kamwa man ha ki sngi wa dadep neibhah ki leh man ki kiwa baam dakha wei wot ya ki khon ki leh e tye ki da ki dakha.

Kawi won kawa dai dakha, ka M. Tham, da ong ko wa i chah khang dakha ha kini ki sngi wa dadep da wanrah ko yei doohnong wa khroo ya ki neibhah da haap chong ki khlem khih khlem kreh.