Ha ka sngi yada Bei Rymaw phah pynman Dorbar ka JHADC wow rai yei yap i im ka Khloo Chnong ha Kwator

Jowai: Mynstep ka 5 tarik toh ka sngi kawa kyrpang kawa tip kam ka World Environment Day namo ka sngi wow yada ya ka Bei Rymaw tangwa ini man i mar dei kylla ha ka chnong Kwator, Elaka Lakadong, East Jaiñtia Hills neibhah mynstep u chong rai ka Dorbar Chnong yei man i long ka khloo chnong kawa tip kam ka Khorkhara.

Kani ka yalang dorbar u pynman hadien wa phah u Chief Forest Officer (CFO) ka Jaiñtia Hills Autonomous District Council (JHADC) wow khut ya ka ha kani ka 5 tarik uni u bnai khnang wow tip lada u pyndam noh namo u pynneh ya ka Registration Certificate yong ka Khloo Chnong (Community Forest) katkam ka chithi wa phah u ha ka ‘Memo No. JHADC/FOR/93/83/(PT)B/324-26 Dated Jowai the 30th May 2017’.

Kam wow pyntip heini ha uni u snem u Waheh Chnong u Ebran Suchen kamjooh leh u Secretary yong ka u Shemphang Rupsi khlem da yohbor na ka chnong tangwa dei yakrehlang du wa ki kattu katni ngut da thmu ki wow pynkylla ya kani ka khloo chnong cha ka thaw samen wei da sdang ki leh wow pam ya ki dieñ wow thang khloo wei da sdang rep ki bru samen ha ini i thaw wa em kani ka khloo.

“Ini i leh yong kini ki ar ngut wa ki kattu katni ngut (Waheh Chnong wa u Secretary) man i iwa pyrchah ya ka aiñ neibhah ya ka thaw chnong ym ye wow pynkylla ya ka cha ka thaw samen” da ong u Bling Rupsi wa u Eshrom.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

Hadien wa tip ki yei thmu u Waheh Chnong kamjooh wa u Secretary wow pynjæd tympra ya ini i khloo chnong da phah dorkhat ki cha u Chief Forest Officer (CFO), JHADC ha ka 8 Naisan 2017 deiwa kyrpaad ya oo wow chim u ki luti wow yada ya kani ka khloo chnong.

Kani ka khloo chnong wa tip kam ka “Khorkhara” da register ya ka wei da pynbna paidbah (Notify) wow man ko kam ka khloo chnong ha chithi wa em ka ‘Notification No. JHADC/FOR/97/82/PT(B)’ ha ka 17 Wisu (March) 2009 wei kani ka khloo heh ko kamwa 59.4 Hectare. Wei ya kani ka khloo toh u pait u yoo wei wow sumaar katkam ki kyndon yong ka United Khasi Jaiñtia Hills Autonomous District Council (Management and Control of Forests) Act Rules 1960 næ katkam ki aiñ wad a chna da ka Executive Committee yong ka JHADC.

Hei yatoh wa ini ha ka 14 Naitung (April) 2017, ki kattu katni ki dkhot ka chnong Kwator, dei mynsien wa sñiawkhia da kyntu ki ya u Waheh Chnong wow khut dorbar wei ya ini da kyntait u.

“Hadien ini i kyntait u waheh Chnong wow khut dorbar da sdang pyllang paid u, wei i tieñ i wa i phah pynman u CFO ya kani ka yalang daw dooh noh iwa da e da booh da ki warim wajah yong I” da ong ki khon ka Dorbar Chnong Kwator.

Da pynsñiaw ki leh wa deiwa leh kamni daw ktah ko joor ya ka mynried mankawi kawa daw wan.