I yaklam yasuk hapyrdi ka sorkar pyrdi, ka sorkar jylla wa ka seiñ Hynniewtrep National Liberation Council (HNLC) daw sdang noh katkam ka rukom ha ka tayaaw wa nyngkong u Naiynru wow wan.
U Montri Rangbah ka jylla u Conrad K Sangma da pyntip u yeini hadien wa wai ka yalang ki Montri ynne ka sngi.
“Ynnin ka sngi, u Symbood Montri Rangbah, u Prestone Tynsong da yachem u wa kiwa yahkhmat ka HNLC wa kynthup ya u Political Secretary, u Vice Chairman wa kiwi ki dkhot najrong ki ksiang wei i yaklam u sdang noh nadooh u bnai wow wan”, da pyntip u Conrad.
Katkam i ong u Montri Rangbah, ka HNLC da rah ko ya ki kattu katni ki phang wei chong i ha ka sorkar wow bichaar ya kini, tangwa ym em khana u kiyi kini ki phang wa ka seiñ da rah ko neibynta wow yaklam khamtam ha ka sorkar pyrdi wa em ki wym em hapoh i bor yong ka sorkar jylla.
Heijooh i por hajrong i mih khubor wa pynkhai im biang ya ka GNLA, u Conrad da ong u wa ka sorkar dang lum yutip ko hajrong ini wei ym em leh stiñ. “I hap i wow pynthikna ya waroh iwa da tip i lada toh kiwa sakhiat neibhah ha ka chi sngi kamwa chi hajar tylli ki yutip wa da yoh”, da ong u Conrad.
