Hadien wa mih i ujor na kiwa boon ki seiñ pyrchah ya i chna ya ka Border Police Outpost ka Assam ha Saba, West Jaiñtia Hills; ynne ka sngi ki bor District ka West Jaiñtia da pynman ki ya ka yalang hapydi u DC wa u SP wa ki seiñbhalang heiyatoh wa ini i kaam.
Ki seiñbhalang wa da em ha kani ka yalang toh ka Jaiñtia Students Movement (JSM), ha Hynniewtrep Border Dispute Redressal Forum (HBDRF), Hynniewtrep Women Welfare And Development Organisation (HWW&DO) wa ka All Hynniewtrep People United Front (AHPUF).
Neiliang u General Secretary ka JSM Eastern Range, u Suni Bareh da ong u wa neiliang ka seiñ da dawa ko wow pynbait ya ini i kaam tangwa neidaw wym chimkhia ki bor District i kreh neiliang ka Assam da man i iwa lai bait.
Da ong u leh wa u DC wa u SP da pyntip ki wa ha kani ka tayaw wa daw wan daw yachem wa ki DC wa SP ka Assam (West Karbi Anglong) wow pynbait noh ya u pood.
Chooh chooh da pyntip u wa ynne da ban joor ki heiyatoh wa i im suk ki paidbah neibhah wa ka sorkar neipor cheipor ymye ko wow pynbait yeini wei lada ymye ka sorkar, neiliang ka seiñ ym yohsa de ko wow hiar da ka neibynta ki paidbah.
