Ha ka thong yong ka Swachh Bharat Mission yoh ki khynnah skur wa em ha Rakabah Cluster yei batai chaphang i leh khooid

Jowai: Ha kani ka sngi Mulong 10 tarik u Naichphaw ki skur kamjooh kiwa sikai wa em ha chnong Rakabah, Thadlaskeiñ Block hei chimkhia u Cluster Resource Person, SSA u Ridon Lajiar da yoh ki ya ka Awareness Programme hajrong ka thong yong ka Swachh Bharat Mission- Swachhta Hi Seva.

Ha kani ka program dawan wow yachimbynta da ki khynnah skur wa kiwa sikai na ka 7 Chnong UPS SSA Nongrimbambthong, Mukbu UPS SSA, RCLPS SSA Pingwait, Nongrimbambthong LPS SSA, Bamkhne LPS SSA, Nongrimbambthong Govt. LPS wa na ka Pomkule LPS SSA.

Ha kani ka sngi chwa wow yoh i klam i batai da yoh chwa ki kyntien yahkhmat hajrong ka thong yong kani ka program na u Ridon Lajiar, Cluster Resource Person, SSA kamjooh ki kyntien sneiñ, kyntien kroo wa ki kyntien kyrsu kyntu ya ki khynnah hajrong ka luti ka yurim wow wanrah yei khooid i pliah ha waroh ki liang heiwa kiwa sikai kiwa da yachimbynta ha kani toh u Kolas Ryngkhlem, ka Nawanki Suchiang wa u Khlur Dkhar.

Neiliang u S.D.Laloo won hei klam i batai hajrong ka thong yong ka Swachh Bharat Mission- Swachhta Hi Seva Programme da ong u wa ka sorkar India ymtoh dang kani ka sien wa sdang ko u khut pynman ya kam kani ka prokram wow yaklam chaphang i khooid i jngiar wei chait i khiah, na ki snem nachwa leh dajooh em kam kani ka jait program tangwa yaphær hi-eh hei pyrtuid wei rukom pynkrehkaam ya ki kamtæ hajrong ka thong yong ka Swachh Bharat Mission da pachat u chiboon ki yumut hapyrdi ki khynnah wa kiwa sikai wei da kyrsu kyntu joor u leh ya kiwa sikai wow kitkhia ki u kdar u pynyoo luti ya ki khynnah man ka sngi hawa em ki ha skur hei wow man ki ki khynnah kiwa tip u kheiñkor yei khooid i jngiar nadooh i dooh i pran yongki samen samen, ha yung ha sem, ha skur kamjooh hapoh ka chnong ka thaw, ka imlang sahlang waroh kawi deiwa leh kamtæ ka khubor yong ka Swachh Bharat Mission u hær ko kylleiñ wei i thrang, i angnood ka sorkar India u man i iwa jop wei poi cha ka thong katkam wa dadep kdaw luti da u Mahatma Gandhi.

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Khaddooh da pynkut ya kani ka program dei wa puræ ya ka Swachh Bharat Pledge da waroh kiwa yachimbynta hei yahkhmat ka Matilda Marboh, Head teacher RCLPS Pingwait.