U Montri Rangbah ka jylla, u Conrad K Sangma da ong u wa i lilam ya u mooyong wa dadep sai u sdang noh ko hapoh ka jylla, wei kawi na ki thaw pynlang mooyong (Depot) ha East Jaiñtia Hills da dep pynbiang ya iwa emkaam wei i pynbna wow lilam noh ya u mooyong daw leh noh ha ki 2-3 sngi wow wan.
Da ong u wa i slem wow lilam ya u mooyong ha ka jylla toh neidaw wa boon ki kyndon wa haap wow bood wei kamjooh wow pynkhreh ya ki Depot wa ki Integrated Check Gate, tangwa lada em i slem wow sdang yei lilam, katni da ye wow pynbiang ya iwa boon iwa emkaam.
Kam wow pynsñiaw heini wa ka National Green Tribunal (NGT), da mynjur ko wow pynlait noh ya i chalan ya u mooyong wa 2 lak metric ton na ka 32 lak Metric Ton wa dadep sai ha jylla Meghalaya heiwa ini toh na ki soo District kiwa kynthup ya ka East Jaiñtia Hills 75,000 MT, West Khasi Hills 50,000 MT, South West Khasi Hills 25,000 MT wa South Garo Hills 50,000 MT.
Hajrong i pynbaad ka liang pyrchah (Congress) wa em i khayi tooh ya u mooyong ha ka jylla, u Conrad da ong u wa ki truck kiwa kit ya u mooyong toh kiwa biang ya ki kot ki sla, wei neiliang ka sorkar da phah ko ya ka chnat pulit wow pait bha yeini.
Da ong u wa ka liang pyrchah u pynbaad bait ko hawa yoo ko ya ki truck wa lai luti wei lada em kiwa kit mooyong tooh, emkaam wow pynsakhiat ki yeini chirup wa ki sabut.
Chooh chooh da ong u wa em ki truck kiwa pyrchang wow kit mooyong tooh tangwa da yoh wow ksoh ya ki wei da pynngat ya ki katkam ki kyndon ka aiñ.
Heijooh i por da ong u wa da em kiwa pyrchang wow tih tooh ya u mooyong wei neiliang ki chnat krehkaam wa pait yeini da ye ki wow pynsangeh noh yeini deiwa pynrap leh wa ka sorkar da ebor ko ha ki pulit wa ki bor District wow pynchitom deiwa khor lada chem ya kiwa leh pyrchah.
